Alyansa Para sa Bagong Pilipinas
Kinsay ipuli ni Imee ug Camille Bisan sa deklarasyon sa campaign manager sa Alyansa Para sa Bagong Pilipinas nga wala sila mahasol sa pagpalaban sa ilang mga kandidata pagka senador nga silang Imee Marcos ug Camille Villar ngadto ni Bise Presidente Sara Duterte, hukman sa administrasyon ni Presidente Ferdinand Marcos Jr. unsay mahitabo sa nahibiling tulo ka semana sa kampanya:
• Ipabilin ba sa ilang sample ballot (nga sundon sa tanan nilang alyadong mga mayor, gobernador ug kongresista sa tibuok nasud) silang Imee ug Camille?; o
• Kon tangtangon, kinsa may ipuli–ang independente o oposisyon bang mga kandidato?
* * *
Ang duha ka luna sa sample ballot dako og epekto sa kataposang duha ka luna sa Senado. Nga gituohang mao na lay ilogan sa eleksiyon karong Mayo 12. Kay gipaneguro nang kadaogan sa walo sa Alyansa ug duha sa dinastiyang Duterte.
Ang desisyon sa Malakanyang sa pagpabilin nilang Imee ug Camille o pagbutang og laing mga ngalan manukad sa duha ka labing bug-at nga sukaranan: Kinsay segurong mo-konbikto ni Sara sa impeachment trial nga sugdan karong Hulyo; ug kinsay labing makatabang nila sa eleksiyong presidensiyal sa 2028.
* * *
Kon ipabilin si Imee, molig-on ang pagtuo nga mas espeso ang dugo para sa mga Marcos (mosamot sang pagduda nga maneguro na silang daan nga kon makabalik ang mga Duterte sa Malakanyang si Imee ray makapugong sa paghurot pagpatay nila).
Kon ipabilin si Camille, maisip nga nisurender nang mga Marcos nga dili silang kapugong sa kadaogan ni Sara sa 2028 ug mosikit na sa mga Villar nga makapanalipod nila gikan sa labing bangis nga panimawos.
* * *
Kon i-apil sa sample ballot silang Kiko Pangilinan ug Bam Aquino, determinado ang administrasyon sa pagkonbikto ni Sara sa Senado aron nga dili nang kadagan (ug kon mo-resign sa dili pa mahumang impeachment trial, mas huyang na sa 2028). Ug nagsalig nga makasugakod sa kaisog nilang Kiko ug Bam ug Senador Risa Hontiveros bisan maningil sa ilang kinawat ug ubang karaang atraso.
Ang pagpili nilang Ben Tulfo ug Willie Revillame nagpasabot nga mamasin ang mga Marcos nga magpabilin nilang alyado si Senador Raffy Tulfo sa 2028 ug nga makalimot si Revillame nga ang kanhi presidente maoy nag-ulug-ulog niya sa pag-apil sa politika.
* * *
- Latest
