EDITORIAL — Daghang kamote drivers

Nagkadaghan ang mga viral videos sa mga drayber nga nagsinumbagay ug nagbinukbokay diha sa kadalanan tungod sa kasungian sa trapiko, gani, duna pay insidente nga duna gyuy gipamusil nga niresulta sa pagkaangol ug kamatayon.

Wala ni labot sa mga aksidente gyud nga niresulta sab sa kamatayon ug pagkaangol sa ilang mga pasahero ug usahay apil ang mga drayber.

Gawas pa niana, daghan kaayong mga aksidente sab sa kadalanan nga naglambigit sa mga aksidente sa mga motorsiklo nga maggara-gara og padagan ug mag-eksibisyon diha sa mga dalan nga peligro para sa tanan apil na sa mismong rider.

Tungod ba kaha kini sa kakulang sa disiplina ug kahibalo sa "basic defensive driving skills" sa ubang drayber kay ang uban nakat-on ra pagpamaneho tungod sa ilang pagkuyog-kuyog isip konduktor, helper o truckboy sa sakyanan o trak nga ilang gitrabahoan? Kulang gyud kaayo  sa seminar o driving skills apan nakakuha gihapon og lisensiya kay gipaagi lang og fixer?

Daghang mga lisensiyadong mga drayber, propesyonal pa gani ng uban, ang nagmaneho og mga sakyanan diha sa kadalanan nga walay klarong trainings nga giagian. Kuyaw pa gyud ani, ang uban drayber na og mga pasaheroan!

Mao nga di na ikahibulong kun ang uban nila wala makaila unsa ng mga traffic signages maong humok kaayong maaksidente. Sila kadtong mga gibansagan karong mga “Kamote Drivers.”

Kining sugyot sa Land Transportation Franchising and Regulatory Board (LTFRB) nga ibalik ang driving academies para sa mga gustong mamahimong drayber og public utility vehicle (PUV), maayo kini.

Dili kini para lisud-lisuron ang mga drayber o operator, kondili pagtabang pa gani kini sa ila aron dili madisgrasya o makadisgrasya.