Gikuhit kaha ko tungod sa pagsiyagit, ‘Ilansang Siya sa krus!’?

Sagrado ang ngalan sa Ginoo. Usa ka dakong sala ang pagpanamastamas, pagbugalbugal sa Iyang ngalan. Apan sala ba ang pagtuman sa sugo sa pari, kinsa gusto nga panahon sa ebangheliyo sa Passion of Jesus Christ kada Palm Sunday ug Biyernes Santo nga mga misa, kinahanglan i-dramatize sa mga lector ang gitamdan nilang Balaang Basahon aron paghatag og dugang kinabuhi ngadto sa bagang duot sa mga nanimbahay nga naminaw?

Mao gayod kini pirme ang akong hinuktokan human sa maong mga misa kay apil g'yud ko pirme sa papel sa Katawhan, diin sa gihukman na si Hesus, kaming lectors, sa hinurot tingog, mosinggit: “Ilansang Siya sa krus! Ilansang Siya sa krus!” Diin, tapos sa maong pagsiyagit, morag adunay talagsaong gahom nga misulod sa akong kasingkasing, daw nanguhit-nangmaymay.

Hinungdan, bisan tapos na ang misa, didto sa gamayng suok sa sacristy ako namalandong-nakapangutana: “Nakasala diay ko sa mao nakong gihimo nga gituman ra man namo ang kamandoan sa among pari?”

“Pero, sayod ka ba, Jav, nga bisag paglitok og JesusMariyoSep, naka-offend na kita sa Ginoo? Unsa na kaha kon imo na gyod Siyang ipalansang sa krus?” Hunghong-pahinumdom sa pikas bahin sa akong hunahuna.

Ug nahatagag katin-awan kining tanan, dihang niadtong Disyembre 1, 2024 na-admit ko sa ospital ug bisan nakagula na niadtong Disyembre 17, hangtod karon ning akong pagsulat, dili gihapon makagawasgawas og dugay sa balay ug makalahutayg taastaas nga panagkukabildo.

Hinungdan, wala na ko makapangalagad sa simbahan isip lector, naputol ang pagsalmot sa tinuig Siete Palabras on the air ug labaw sa tanan, unang higayon nga dili makatambong isip speaker sa Ikapito Ka Kataposang Pulong ni Hesus sa tinuig tulomanon sa pamilyang Alcoseba didto mismo sa ilang dakong balay sa Garnetville. “Ma’am Amay, Brod Leo ug sa tibuok pamilya, sorry kaayo, ha?”

Hisabtan dayon nako ang mensahe sa Ginoo nganong gipasinati Niya kini kanako? Nganong dili ko una Niya paalagaron sa simbahan ug sa mga balaanon kong tulomanon sa Holy Week? Kini tungod kay Iyang gitubag-natubag akong pangutana: ‘Gikuhit kaha ko ni Hesus tungod sa pag-apil-apil kog siyagit og: ilansang Siya sa krus!’?

Oh, Ginoo, among Manunubos, intawon ako pasayloa!

Kon atong basihan ang ulahing mga survey, si Senador Go maoy nag-una sa mga kandidato ilalum sa bandila ni kanhi presidente Duterte nga siguradong modaug sa sunod eleksiyon.