EDITORYAL - Pataka og paghot

Daghang mga krimen nga nahitabo diha sa kadalanan, sa mga komunidad, apil na sab ang pagkuyanap sa ilegal nga drugas nga nanggawas diha sa social media nga gipang-post sa mga pribadong mga tawo nga naatlang diha sa pagkahitabo sa krimen.

Kung tan-awon ang mga posts, mura og mas nakauna pa sila sa mga otoridad o sa kapolisan diha sa crime scene. Ang ubang mga caption makapainit pa gyud sa balatian sa mga makatan-aw kay ang unod mapanghagiton kaayo.

Natempohan nga naa sila sa pagkahitabo ug naka-record sa cellphone camera, ang nakabati lang kay ang caption mura og ilang gipagawas nga tungod kini sa presidente sa nasud karon.

Sugnoran pud sa mga iresponsableng netizens nga sagulan og komentong pamolitika ang ilang post bahin sa nahitabo. Kay lagi, maong nigara na ang mga kriminal karon tungod kay dili na si Duterte ang presidente.

Bisan gani ang mga tawong nalisoan og pangisip nga naglaruy-laroy sa kadalanan ila sab gipasangil ngadto sa kasamtangang presidente nga mura og sigurado silang ang presidente karon maoy hinungdan.

Una sa tanan, samtang tuod nimenus ang krimen sa pipila ka mga lugar sa Pilipinas sa panahon ni Duterte nagpatong-patong man sab ang mga kaso sa mga pagpatay atol sa iyang unom ka tuig nga pamunoan.  Gawas pa niana, dul-an tulo ka tuig o katunga sa termino ni Duterte higpit ang health protocols tungod sa pandemiya sa COVID-19.

Bisan ang tawong wala magsuot og “prescribed” nga face mask ug dili magsuot og face shields tanggungon man gani tungod sa paglapas sa health protocols.

Kinsa mang mga esnatser o mga kriminal ang magpasaya-saya adtong panahona nga mas daghan pa ang mga polis itandi sa mga tawo diha sa kadalanan.

Sa pagkatinuod karon, mas daghang malampusong operasyon nga nahimo ang kapolisan sa hilom kun itandi anang pipila ka krimen nga naatlan,nakuhaan og video sa mga netizens o cctv camera apan gustong ipagawas sa uban nga naghari-hari na sab ang mga kriminal karon.

Trabaho sa polis ang pagsikop sa mga kriminal, dili sa presidente, ug dako og papel ang katawhan kontra sa tanang matang sa krimen.