Nagpabuta-bungol ang Kongreso

Lain na usab nga petisyon ang gipasaka sa 1Sambayan Coalition kauban sa Sanlakas ngadto sa Korte Suprema nga naghangyo nga pugson ang Kongreso pagpalabang og balaod nga magpatin-aw ug magdili na sa mga political dynasty.  Alang sa mga petisyoner, ang maong petisyon usa ka desperadong pagsuway paghatag og kinabuhi sa 1987 Constitution ug usa ka paagi pagbadbad sa pagtuok sa mga dinastiya sa atong nasud.  Padayon ang pagpakabuta-bungol sa kongreso kabahin ni’ng maong isyu tungod sa tataw nga mga rason.  Matud pa sa akong higala, “Mas dali pa tingale amendahan ang ‘Law of Supply and Demand’ kay sa magpanday og balaod nga magdili sa political dynasty.”  Fezteleern!

Kulbahinam ang matag yugto

Gipaningkamotan sa mga abogado ni kanhi presidente Rodrigo Duterte nga mapahigayon ang iyang interim release bisan pa man nga wala pa sila makadesider kon kanus-a gayod sila mopasaka sa ilang petisyon mahitungod niini ngadto sa ICC.  Kulbahinam ang matag yugto sa mga panghitabo sa kinabuhi sa kanhi presidente. Kon molampos ang mga abogado ni Duterte pagpalingkawas kaniya, daghan ang mag-ambahan apan kon dili, magminghoy usab ang mga dumadapig, Depende sa resulta, mahimong padayon silang mokanta og “Please, Release Me” o ba kaha, kon buhian, awiton nila ang “Tie a Yellow Ribbon.”  Madahaan!

Likayan ang pagka-hotheaded

Gipahinumduman ni LTO Chief Asst. Secretary Vigor Mendoza ang mga motorista nga magpabilin’g kalma ug magmabugnawon diha sa kadalanan aron malikayan ang mga bayolente nga panagbingkil sama sa nahitabo ni’ng bag-o lang sa usa ka driver sa SUV nga nakapusil sa usa ka motorcycle rider human sa pisikal nga panagbingkil. Tinuod nga ang pagkasapoton sa tawo nga maoy magtukmod usab kaniya nga mahimong hambugero, wala gayo’y ikahatag nga kaayohan sa tawo.  Kay matud pa bitaw, “Ang kainit sa ulo ug ang katig-a sa kasing-kasing dili gayod makasulbad og bisan unsang suliran.”  Muleeng!

Apil-apilon man gud

Namahayag ang AFP Chief nga si General Romeo Brawner nga dili kuno malikayan nga maapil ang Pilipinas kon ugaling ang silingan’g nasud sa Taiwan paga-okupahon na sa China.  Gimandoan na niya ang kasundalohan sa pagsugod na sa pagpangandam alang sa posibleng pagpanakop nga pagabuhaton sa China ngadto sa Taiwan.  Dili maayo nga manginlabot kita sa panghitabo sa atong silingan nga mga nasud labi na kon kagubot ang ilang pagabuhaton. Kon unsa ma’y sangpotanan ni'ng atong pag-alig-alig sa ngalan kunohay sa pagpangandam, basin ingnon lang unya kita sa China nga, “Ngano’ng ni-enter?”  Atala lagee!

Dili maantigo mo-drive

Giangkon sa Malacanang nga napakyas kini pagkab-ot sa gitumong niini nga usa ka milyon ka housing units matag tuig tungod sa mga kakulian kalabot sa konstraksyon ug sa pagpangontrata,  kalangan sa pag-release sa mga development loans, pagkuha sa mga permit ug ang pagtino sa tag-iya sa yuta. Kon buot hunahunaon, ang maong kalangan may dakong kalambigitan sa kakulang sa maayong liderato ug hustong pagplano sa proyekto.  Makapahinumdum kini’ng housing project sa gobyerno sa duwaan nga trak-trak sa akong apo nga nagsige lang kapangka sa bongbong kay dili man lage maantigo mo-drive sa remote control ang bata.  Pagkatuytoy!