“Milagro, pribadong pagpadayag, ug mga aparisyon” Ikaduhang gula

Busa sa mga panghitabo nga dili kasarangan angayan lamang nga maminaw kita sa Simbahan ug sa iyang pamahayag kalabot niini, bisan pa man kun kini malangay.

Ang atong kaluwasan nahatag nang daan diha sa Diosnong Pagpadayag (Divine Revelation) ug kun ugaling madasonan kun ma aprobahan ang usa ka pribadong pagpadayag (Private Revelation) ang makapadugang sa atong pagtuo apan angayan natong hinumdoman nga dili nato kini pagahimoong pokus diha sa panaw sa pagtuo.

Kun ang Simbahan mohimo og deklarasyon kalabot sa mga pribadong pagpadayag, mga aparisyon, ug mga milagro nga dili gikan sa Dios (N.B. Sa ato pa dili supernatural kondili preternatural kun gikan sa yawa nan, angayan lamang nga kita mopahilayo gikan niini bisan pa man kun nituo ug nakapahimulos kita kanhi niini. Sa wala pa ang pormal nga nga deklarasyon sa simbahan kalabot niini ug nituo man kita niini.  Apan kun ang Simbahan na gani ang moluwat ug pamahayag nga ang atong gituhoan dili iya sa Dios ug magdumili kita sa pagtahan sa kabubut-on sa Simbahan nan, dili kini pagtuo hinunoa, usa kini ka garbo ug pagmagahi. Dili na kini mapuslanon alang sa atong Espirituhanong Kinabuhi sanglit, anaa man ang pagkamasinupakon diha sa atong kasingkasing.

Hinunoa, luyo niini ang kakuyaw nga espirituhanon ug ang yawa nagpahipi luyo niini labina kun nahimo kining sukwahi diha sa pagtulon-an sa Simbahan. Ang hustong proseso ingon man pagtulon-an kalabot sa mga pribadong pagdayag ang makita ug Mabasa diha sa dokumento: NORMS REGARDING THE MANNER OF PROCEEDING IN THE DISCERNMENT OF PRESUMED APPARITIONS OR REVELATIONS.