Mga palpak

Tungod kuno sa kanunay’ng pag-ilis-ilis og mga department head sa Cebu City government, unya way “proper turnover” sa mga dokumento nga naglambigit sa ilang mga opisina, apektado niini ang ilang mga gimbuhaton.

Mora’g tinuod kini nga obserbasyon sa usa ka konsehal sa siyudad kay ako dugay na kaayong nahimong reporter sa Cebu City government ug nasuhito ko sa ubang mga isyu nga naglambigit ang dakbayan.

Mao diay kini ang hinungdan nga dunay mga proyekto nga dugay kaayong mapatuman kay kadtong mga opisyal sa departamento nga maoy nagplano sa proyekto, kon matangtang sila sa pwesto, usahay mawala ang mga dukomento.

Kini maoy rason nga dugay kaayong napatuman ang Wastewater Treatment Plant nga giplano sa siyudad nga tukoron diha sa Barangay Kalunasan aron pagsulbad sa problema nga naglambigit sa Cebu City Jail.

Tinuod gyud, mag-ilis-ilis ang mga opisyal nga magdumala sa mga pwesto sa City Hall, apil nga mag-ilis-ilis ang mga kawani kay ang mga opisyal usahay mokuha sab sila og ilang mga sinaligan.

Usa ka sanglitanan niini mao ang tinguha sa Cebu City government kaniadto nga mopalit og “walking excavator” usa ka matang sa ekipo nga mora’g molakaw ug maoy mohabwa unta sa mga lapok sa kasapaan.

Kaniadto kantidad pa og P20 milyones ang maong ekipo, apan tungod sa pagkalangay sa pag-aprobar aron mapundohan og kwarta ang maong pagpalit sa ekipo, naabtan sa pagsaka sa prisyo ug wa na madayon.

Dia pay lain, ang atong kadagkoan sa City Hall karon wa na kaayo masayod unsa nga mga yuta nga napalit sa siyudad kaniadto, ug kon hain kini mahimutang.

Pananglit kon ang siyudad mosubasta og mga yuta ngadto sa publiko, kang kansang mga tag-iya wa makabayad sa buhis ngadto sa kagamhanan sulod sa dugay na nga katuigan, kon way mopalit sa maong yuta ang balaod nag-ingon nga ang yuta maisip na nga napalit sa Cebu City government.

Ang katuyoan sa balaod nga gitugotan ang kagamhanan nga mosubasta sa yuta nga wa bayari og buhis sa tag-iya, aron nga makolekta niini ang buhis. Ang subra sa halin sa property nga giibanan na sa bayranan sa buhis, ihatag kini ngadto sa tag-iya.

Sulod sa usa ka tuig nga “redemption period” kon dili malukat sa tag-iya ang iyang yuta nga wa mabayri og buhis, hingpit na kini nga mapanag-iya sa kagamhanan nga naghimo sa subasta.

Daghan kaayong mga yuta dinhi sa siyudad nga ingon niini ang sitwasyon, apan ang pangutana, duna bay rekord niini ang atong kadagkoan sa Cebu City government?

Duna pay ubang mga kabtangan nga gidonar para sa Cebu City government nga wa gyud mahipunta sa syudad, sama sa mga tire clamps, motorsiklo, medical equipment ug uban pa.