Nanggakos og 12-anyos nga bata gipadakop

CEBU, Philippines — Nabalhog sa prisuhan ang usa ka construction worker human gipasanginlan nga nanggakos og bata diha sa sa Barangay Tisa, siyudad sa Sugbo niadtong Domingo sa gabii, Pebrero 16, 2025.

Ang dinakpan mao si alyas Al, 55 anyos, construction worker ug nagpuyo sa Barangay Putingbato, Toledo City samtang ang biktima usa ka 12-anyos nga batang babaye.

Giingong nagpahipi sa ngitngit nga dapit ang suspek ug giatngan ang bata nga nag-inusarang mopauli sa ilahang balay.

Matod pa dihang duol na ang bata giambakan kini sa suspect ug gigakos og hugot kaayo.

Nikisi-kisi matod pa ang bata ug gisagpa ang suspect.

Apan giingong mas gigakos og maayo sa suspect ang bata hinungdan nga gihapak sa biktima ang kamot sa suspect sa gibitbit niining bato.

Nasayran magdala-dala og bato matod pa ang bata kun mouli kini nga siya rang usa kay mahadlok.

Nakabuhi ang bata, nakadagan ug didto nisumbong sa nahitabo kaniya.

Apan ang suspect nga napriso sa Labangon Police Station 10 Cebu City Police Office nga nahinabi sa DYSS Super Radyo Cebu nihimakak sa pasangil batok niya.

Matod niya wala niya buhata ang maong krimen.

Nakuratan nalang ang dinakpan nga giadto sa inahan sa bata sa ilang barracks ug gisagpa deretso tungod sa pasangil nga gihilabtan niya ang bata.

Sigon sa suspect nakainom siya apan dili matod pa hubog ug giingong wala mahitabo nga gigakos niya ang bata.

Naglingkod ra siya sa barracks ug nahibulong nga naay istorya nga bati batok kaniya.

Suod sa dinakpan ang bata gani usahay tagaan niya og pagkaon ug kwarta.

Matod sa dinakpan dunay mga saksi nga siya wala molakaw sa ilang barracks.

Gi-andam na sa WCPD ang kasong ipasaka batok sa suspek. (BANAT NEWS)