EDITORYAL — ‘Ipapatay’ ang 15 ka senador

Nagkalain-lain ang mga reaksyon mahitungod sa gipamulong ni kanhi presidente Rodrigo Duterte sa usa rally para sa iyang mga gituboy nga kandidato sa pagka-senador sa dihang kini miingon nga aron masiguro nga makalingkod ang iyang mga batos, maayong ipapatay ang mga naglingkod nga mga senador karon diha sa Senado.

Dili na kini bag-o nga mga linya sa kanhi presidente, makadaghan na niya kining gibuhat ilabi niadtong naglingkod pa siya sa Malacañang.

Naanad nasab ang mga tawo nga ingon niana siya manulti, gani ang uban ganahan sa iyang mga antics nga ingon ani kay para nila pagpakita kini og “political will.”

Apan lahi ang pagtan-aw sa mga magbabalaod sa iyang gibuhat. Para nila ang komedya maayo lang kun dili lang ingon ani nga maghisgot nga ipapatay ang mga naglingkod nga senador.

Para nila, samot nga dili kini maayong paminawon kun nagagikan kaniya nga kanhi presidente sa nasud ug dunay mga kwestyon bahin sa iyang war on drugs nga diin daghan ang mga nangamatay apil ang matud pa mga inosente kay ang mga polis daw giganahan gumikan sa gialegar nga dunay reward matag drug suspect nga ilang mapatay.

Si Senadora Risa Hontiveros kauban ang ubang mga minority senators miingon nga sa kadaghang problemang gisagubang sa katawhan, kana pa gyung pagpatay maoy nigawas sa baba ni Duterte.

Samtang si Senate Minority Leader Aquilino Pimentel III miingon nga bahala na ang Department of Justics ug National Bureau of Investigation pagimbestigar kun dunay krimen nga gibuhat si Duterte sa iyang pamahayag.

Apan para kaniya, kun ang tawo gani dunay obsesyon nga ganahan og pagpatay sa matag makigpulong kini, nabalaka siya nga senyales kini og “serious personality disorder.”

Si Rep. Zia Alonto Adiong (Lanao del Sur, 1st District) miingon nga kining pagpanghulga sa kinabuhi sa uban dili unta angay buhaton ilabi na kun gikan kini sa impluwensiyadong tawo, matud niya dili unya himuong komedya ang mga ingon niini kay basin dunay mga supporters nga magtuong tinuod kini.

Si Adiong miingon nga kun yanong tawo gani molitok lang og “bomba” o mopapatay og tawo bisan komedya dakpon ug kasohan, buhaton sab unta kini bisan impluwensiyado o gamhanan pa.