Kasaysayan sa impeachment
Makatabang tingali pagkumbinser sa mga senador sa paghimo sa ilang trabaho pagsugod na sa impeachment trial ni Bise Presidente Sara Duterte kon pahibaw-on sila nga ang kasaysayan sa duha ka impeachment trials sa nasud pulos nipabor sa mga nibotar batok sa mga sinumbong.
Ang mga senador nga nibatok ni kanhi Joseph Estrada sa 2001 ug ang mga senador nga nikonbikto ni anhing Chief Justice Renato Corona sa 2012 pulos nidaog sa mga eleksiyon pagkahuman sa mga husay. Sa pikas nga bahin, mga nipabor nilang Estrada ug Corona kasagaran nangapilde.
* * *
Wala mahuman ang husay ni Estrada sa 2001 kay naapsan sa EDSA Dos tungod sa pagbalibad sa mosunod nga 11 niya ka alyadong senador sa pag-abli sa ikaduhang sobre nga gituohang makapalig-on sa mga ebidensiya batok niya: Blas Ople, Miriam Defensor-Santiago, Juan Ponce Enrile, Gringo Honasan, Sonny Osmeña, Tessie Aquino Oreta, Tito Sotto, Nikki Coseteng, Ramon Revilla Sr., Sonny Jaworski ug Kit Tatad.
Napilde sa eleksiyon sa 2001 ang reelectionists nga silang Santiago ug Enrile. Bugtong nakadaog si Honasan (ika-13). Wala nang kabalik sa Senado silang Coseteng, Tatad, Revilla Sr., Oreta, Jaworski ug Sonny Osmeña. Si Ople gitudlo ni kanhi Presidente Gloria Macapagal-Arroyo nga foreign affairs secretary sa 2002.
* * *
Mas napahimutang ang 10 nga nibotar pag-abli sa sobre: Rodolfo Biazon, Renato Cayetano, Franklin Drilon, Juan Flavier, Teofisto Guingona Jr., Loren Legarda, Ramon Magsaysay Jr., Serge Osmeña, Aquilino Pimentel Jr. ug Raul Roco.
Gitudlo ni Arroyo si Guigona isip bise presidente ug si Roco isip education secretary. Pulos nidaog ang upat ka reelectionists nga silang Drilon, Flavier, Magsaysay Jr. ug Serge Osmeña. Nakabalik sa Senado sa nisunod nga mga eleksiyon silang Pimentel Jr., Biazon, Legarda. Namatay si Cayetano sa 2003 nga wala katiwas sa iyang termino.
* * *
Bisan sa gipasidaan nga bloc voting sa Iglesia ni Cristo (INC) nga nisuporta ni Corona, nidaog sa 2013 ang lima ka reelectionists sa 20 ka senador nga nikonbikto niya: Sonny Trillanes, Alan Peter Cayetano, Honasan, Legarda ug Pimentel. Nakadaog sa 2016 ang tulo nga nikonbikto sab: Ralph Recto, Drilon ug Sotto.
Duha sa tulo nga ni-absuwelto ni Corona napilde sa 2016: Santiago pagka presidente ug Ferdinand Marcos Jr. pagka bise presidente.
* * *
- Latest
