Oplan Galugad

Niuban ko sa reactivation sa kapolisan sa dakbayan sa Sugbo sa anti-criminality campaign nila niadtong nakalabayng Huwebes sa gabii isip observer kay lagi gusto pud nako masaksihan personal ang gitawag nila nga Oplan Galugad. Unsa man ni nga programa? Tagalog word ni nga buot pasabot pagsuhid sa mga dapit diin adunay mga tawong nakalapas sa balaod.

Mismo si Col. Enrico Figueroa, ang director sa Cebu City Police Office, ang nangulo sa operasyon nga ilang gihimo ug gisudlay sa pwersa sa kapolisan ang mga dapit nga giisip nga kritikal tungod sa mga kaso sa pagpamusil lakip niini ang Mambaling, Duljo Fatima ug Basak San Nicolas.

Giadto sa kapolisan ang mga suok nga dapit ug nasaksihan nila nga adunay daghang mga tawo ang anaa sa gawas bisan pa og lawom na nga kagabhion, apil na ang mga minor de edad nga nagduwa og billard. Naa usay naghukas sa ilang senina.

Ang operasyon sa kapolisan mao ang pagpatuman sa city ordinance apan ila unang gihatagan og warning ang mga tawo o nagpaila ila pa sila sa ilang programa kay sa sunod nga operasyon pangdakpon na nila kadtong malapason sa balaod.

Nagpatuman usab sila sa oplan sita o Comelec checkpoint diin gipangsita ang mga motorista kong compliant ba sila sa lagda sa trapiko ug labaw sa tanan wala ba sila nagdala og mga kontrabando sama sa armas ug illegal nga drugas.

Gihangop hinuon sa mga molupyo ang gihimo sa kapolisan aron mabadlong ang mga  batan-on nga maoy sagad nagpasiugda og kagubot sama nahitabo ning bag-o lang sa San Nicolas proper nga nagkaagwanta ang grupo sa mga batan-on ug nakuhaa sa CCTV ang hitabo.

Ang Oplan Galugad ang kalihokan isip pagpangandam sa umaabot nga eleksyon aron maseguro nga hapsay ug malinawon ang syudad aa umaabot piniliay.  

Sinugdanan pa lang kadto kay hinuon nilang sunod sunod ang pagpatuman sa mga lagda aron maseguro nga walay motumaw nga kagubot. Dili angayan kompyansahan karon ang panahon nga gikinahanglan nga bantayan sa kanunay. Ang mga pulis ra usab ang bantayan sa mga dautang elemento kay init talikod nila mobalik ra usab dayon sila sa dapit ug padayon sa ilang kalihokan nga magmuna og kasamok.

Mahinungdanon ang pagtinabangay sa katawhan aron kapanalipdan ang matag usa kanato dili nato isalig ang tanan ngadto sa mga tinugyanan sa balaod inay kita ang timbang nila kay ang mga tawo ang mas nasayod sa mga panghitabo sa ilang dapit ug kinsa kadtong angayan nga targeton daan mintras wala wala moabot ang eleksiyon.