Pagkabulahan Maayong Balita

Pagpamalandong Matag Domingo

Pebrero 16, 2025: Ika-unom nga Domingo sulod sa tuig

Mga Pagbasa: Jer. 17;5-8/

Sal. 1/1 Cor. 15;12,16-20/Lk. 6;17, 20-26

Kun atong tan-awon ang mga sukaranan aron ingnon nga bulahan ang matag tawo segun sa pagtulon-an sa atong Ginoo ang dakong sukwahi sa pagtulon-an sa kalibutan.

Lisod sabton kun nganong maisip nga bulahan ang gigutom, ang mga kabus, ang mga sinalikway, ang mga dinaugdaog. Ug nganong nahimong alaot sila nga mga dato karon, sila nga mga busog karon, sila nga mga nagkatawa karon. Apan ang panlantaw sa Ginoo lahi sa atong panlantaw ni ang iyang pamaagi lahi man sa atong pamaagi.

Kasinatian

Kitang tanan mga kabus atubangan sa Dios. Sa kapasikaran nga matag usa kanato walay kaugalingon. Bisan gani ang atong kinabuhi dili man kita ang tag-iya.  Ang nagsalig sa kalibutan sila kadtong mga tawo nga wala makatugkad sa tinuod nga bahandi. Ang tinuod nga kadato anaa man sa Ginoo ug wala sa atong nahuptan nga kun buot hunahunon lumalabay lamang. Matud pa ni Santa Teresa sa Avila: “Ang Dios Paigo Na!”

Lihok

Ayaw tugoti ang bisan unsang kalibutanon nga maoy magmando sa imong kinabuhi hinunoa, gamita ang bisan unsang lumalabay alang sa kahimayaan sa Dios. Bakasyonista lang kitang tanan ning kalibutan busa paningkamotan nato nga mohimo kita og kalainan gikan sa naandan ug kadaghanan. Kini ang kahulogan kun maghisgot kita og pagkabulahan.

Pangamuyo

Ginoo, salamat sa imong gihatag kanamo. Sa makadaghan kami dili kuntento apan diha sa imong grasya himoa nga ikaw lamang ang among pangitaon sa tanang mga butang ning kalibutan. Ikaw nga buhi ug hari hangtud sa kahangturan. Amen.