EDITORYAL - Emergency Button

Ang Police Regional Office (PRO)-7 nilusad sa ilang "Emergency Alert Button App" nga magamit sa publiko aron makapangayo og tabang panahon sa emerhensiya.

Matud pa sa pangangkon sa PRO-7, dependable communication tool kini nga magamit bisan walay load o data o internet.

Si Police Brigadier General Redrico Maranan, Regional Director sa PRO-7 miingon nga gidesinyo kini aron paspas nga makaresponde ang kapolisan bisan unsang orasa.

Matud pa niya, gamit kaayo kini sa mga balay patigayon ug mga vital installations sa Central Visayas.

Pinaagi kuno niini makapadala dayon og emergency alert ang publiko sa mga police stations kun dunay emerhensiya.

Dili na kini bag-o ang mga emergency hotlines kay naa na kaniadtoy Emergency 911 nga kinopya sa Amerika, naa pay kadtong Patrol 117 hotlines ug dagha pang uban.

Apan nakasugat kining tanan og problema, wala molahutay ug wala sab molambo aron ma-maximize ang gamit sa publiko.

Usa sa rason mao nga napolitika pirme ang mga ahensiyang nagdala niini tungod sa pagpuli-puli sa mga liderato sa nasyonal ug sa lokal.

Ikaduha, kuwang sa kahimanan sa komunikasyon ang mga lokalidad, apil na ang mga sakyanan pang emerhensiya ug daghan pang uban nga wala gyud makorihii tungod sa politika.

Gawas pa niana, dili sab kini direkta sa mga lokal nga kapolisan kay moagi pa sa Manila una pa ipasa balik sa lokal nga otoridad, malangay na og abot, usahay uwahi na.

Mao nga wala kaayo ganahi ang publiko paggamit adto kay imbes dinalian, malangay hinuon.

Apan kaning sa Emergency Button App sa PRO-7 dako og potensiyal tungod kay button ra sa cellphone ang pisliton aron makaabot dayon sa hingtungdang police stations ang alarma.

Makita kini sa Google Playstore ug kinahanglan lang i-install ang One Button SMS ug usa ka pislit lang sa button nadawat kini daw dayun sa hingtungdang police station duol sa lugar. Maayo kini nga inisyatiba, maayo unta og magpadayon kini hangtud sa hangtud bisan kinsa pay molingkod nga hepe sa PRO-7.