Katawhan ray makatay-og
Daghang salamat sa kamabinantayon sa mas nasuhito sa mga lagda sa Senado ug sa 1987 Constitution (sama sa mga kanhi presidente sa Senado ug mga sakop sa constitutional commission nga nagpanday sa konstitusyon), nasakpan ang tanang palusot ni Senate President Chiz Escudero sa wala kinahanglana nga paglangay-langay sa impeachment trial ni Bise Presidente Sara Duterte.
Pero kay nitak-om ang mayoriya sa mga senador sa bisan unsang gipanulti ni Escudero ug kay ilang eksklusibong gahom ang paghimo sa impeachment trial, walay makapugos nilang Escudero ug kaubanan sa pagtuman sa ilang trabaho.
* * *
Gawas lang sa tingog sa katawhan:
Kay kon nahadlok ang mga senador, labi na ang reelectionists, nga maibanan ang ilang mga boto kay masuko nilang mga dumadapig sa mga Duterte kon sugdan ang husay sa wala pay eleksiyon,
Angay silang pahinumdoman nga segun sa nasudnong survey sa Social Weather Stations (SWS) sa niaging buwan mas daghan (41%) ang ganahan nga manubag ang bise presidente giunsa sa paggasto ang iyang P612.5 milyones nga confidential funds ug ubang seryusong mga pasangil batok niya kay sa mga nisupak sa impeachment (35%).
* * *
Maong salamat sa mga magbubuhis nga nag-apura sa husay pinaagi sa pagkomentaryo sa social media pages sa mga senador. Ug sa mga mas kamao ni Escudero nitumbok sa iyang sayop:
Si Senate Minority Leader, kanhi Senate President ug Bar Topnotcher Koko Pimentel nipasidaan nga kalapasan sa konstitusyon ang paglangay sa husay og kapin sa tulo ka buwan; ug
Si Retired Supreme Court Senior Associate Justice Antonio Carpio niingon nga taas rang lima ka buwan nga kalangay kon tinud-on ni Escudero nga sa Hulyo nang husay.
* * *
Hangtod kanus-a silang Escudero ug kaubanan nga magpabungul-bungol sa lehitimong awhag sa mga magbubuhis, nga maoy naghago, nagtukaw ug nagkadusingot sa pagtampo sa dagko nilang mga suholan ug benepisyo, nga tumanon nilang klaro ug walay likuliko nga sugo sa konstitusyon.
Dili sayon nga madungan ang husay sa kampanya, dili sayon nga bira-birahon ug dudahan ug tulisukon sila sa mga dumadapig ug mga kaatbang sa bise presidente. Pero kabahin sa trabaho nga ilang gipanumpaan ang paghusay sa labing dagkong mga opisyal sa gobyerno nga gipasanginlang niabuso sa pagsalig sa katawhan.
* * *
- Latest
