EDITORYAL — Kamote riders, mao pay reklamador

Gisaway pinaagi sa social media ang road separators nga gibutang diha sa Osmeña Boulevard kay gipasangil nga mao kini ang hinungdan sa mga aksidente sa unang adlaw palang sa pagbutang niini. Ang aksidente halos tanan naglambigit og mga motorsiklo nga aksidenteng nakaligis niini hinungdan sa ilang pagkalukapa diha sa maong dalan.

Apan sumala pa sa Cebu City Traffic Office, nianang adlawa usa ra gyud ka insidente ang opisyal nga natal diha sa kapolisan. Sa ato pa ang uban ani, wala modangop sa kapolisan o moreklamo didto kondili diha nalang gipaagi sa social media sila nagyawit.

Hinuon makasabot sab ta, tingali nakahibalo sila nga bisan modangop pa sila sa polis human sa nahitabo, sa ilang pag-analisar sa hitabo ug sa ilang gibuhat ini og imbestigar kanila, nakahibalo sila nga sila gihapon maoy mabasol ug posible pa hinuong pabayron sila sa naguba nga road separator.

Kun sa social media nila kini iwadwad ang ilang reklamo, makakuha pa sila og simpatiya sa publiko, ilabi na niadtong mga parehas sab nilang mga riders.

Pagkatinuod lang, sakto ang CCTO sa ilang pamahayag nga kining gibutang nga road separators wala kini tuyoa pagbutang aron dunay madisgrasya. Apan ngano mang duna may nangabalintong diha kun kini gibutang aron walay maaksidente?

Tinuod maayo ang intensiyon sa pagbutang ani, gitun-an kini og maayo sa mga road safety engineers, apan bisan ilaha na kining kinaon nga trabahoa ug bisan unsa pa sila ka eksperto sa road safety, kun ang mga riders “kamote” og utok, naa gyuy madisgrasya. Gibutangan gani og road separators para walay magtrapo-trapo (kanang magbalhin-balhin og lanes) diha sa maong dalan aron likay sa aksidente.

Sagad man gud aning mga kamote riders dili mosunod anang mga road signs, solid ug doulble solid yellow lines, basta ang ilaha dali rang makalusot. Bisan unsa pay ibutang diha nga para sa kaluwasan sa mga motorista ug pedestrians kun dili kini tahuron, sigurado gyung dunay madisgrasya.

 Maayo diha, himuong sampol kanang dalana sa estriktong pagpatahod sa balaod sa trapiko, ipabilin ang separators unya butangan og daghang traffic enforcers, kun duna gihapoy mabalintong, pabayron sila sa danyos sa imprastraktura, mao ni paagi pagputol sa kinaiya sa mga kamote drivers.