Sugod nang husay
Samtang padayong giyak-an nilang Senate President Chiz Escudero ug ubang mga senador ang impeachment complaint batok ni Bise Presidente Sara Duterte, ang mga kongresista nakahukom nga sugdan na nila ang impeachment trial sa kinatas-an nga hukmanan sa nasud–ang korte sa public opinion.
Samtang nagsige og pangugat si Escudero nga ang “forthwith” nga sugo sa 1987 Constitution wala magkahulogan og “immediately,” ang mga sakop sa House panel of prosecutors nagsige og pahibawo sa publiko sa kalig-on sa ilang mga ebidensiya nga ipresentar atol sa impeachment trial aron pagsegurong makonbikto si Duterte.
* * *
Samtang nitago sa langob ang mga senador pagpakahilom atubangan sa pag-apura sa mga eksperto sa konstitusyon, ang mga kongresista kada adlaw nipahibawo og bag-ong kasayuran pagpasalig nga andam sa pagmatuod sa tanang pito ka articles of impeachment.
Samtang gipahinumdoman ang mga senador sa mga naghimo sa 1987 Constitution nga mahimo diay silang magtigom ug manumpa isip impeachment court bisan atol sa recess ug bisan dili mopatawag si Presidente Ferdinand Marcos Jr. og special session, ang mga kongresista nikumbinser sa publiko kinsay mas takos ug kugihan pagtuman sa ilang trabaho.
* * *
Niadtong Miyerkules, gihangop sa mga kongresista ang mga kasong kriminal nga gipasaka sa National Bureau of Investigation (NBI) batok ni Duterte nga makapasamot sa pagpalig-on sa ilang mga ebidensiya sa paghulga ni Duterte sa pagpatay sa presidente, First Lady Liza Araneta Marcos ug House Speaker Martin Romualdez.
Niadtong Martes, nipahibawo ang mga kongresista nga ilang ipa-supina ang joint bank account nilang Bise Presidente Duterte ug kanhi Presidente Rodrigo Duterte nga giingong dunay binilyon ka pesos nga mga deposito.
* * *
Niadtong Lunes, nipahibawo si Kongresista Jinkee Luistro, usa sa House prosecutors, nga tun-an nila ang pagdangop sa Korte Suprema kon padayong langayon ang impeachment trial. Niadtong weekend, niinsistir si Kongresista Lorenz Defensor, laing prosecutor, nga nahimo nang impeachment court ang Senado sa ilang pagdawat sa articles of impeachment sa Miyerkules sa niaging semana.
Samtang magbaha ang walay kinutoban nga mga bombardiyo sa House, mapugos si Escudero pagkubkob og mas lawom nga gahong para sa iyang mga palusot. Ug mosamot sa paglungutlungot ang mga Duterte nga mas maayo pang sugdan nang husay aron makapanalipod sa ilang kaugalingon.
* * *
- Latest
