Subornohay

Naguol ko’ng naminaw sa rason sa mga kongresista nga namirma pabor sa impeachment ni Bise Presidente Sara Duterte.

Kini tungod kay wa gyuy usa sa mga naningog ug misuway pagpasabot sa publiko nganong pabor sila ang miingon nga kumbinsido silang dunay igong basihan aron palagputon ang bise presidente.

Sagad nila kun di man tanan, pulos hadlok nga mawagtangan og pundo alang sa ilang mga programa ug proyekto.

Makasubo nga kwarta ang nahimong basihan sa kadaghanan sa mga kongresista paghimo og baruganan sa mga importanteng isyu sa nasud sama sa impeachment.

Makaguol nga kadaghanan sa atong mga kongresista nawong og kwarta inay nga interes sa nasud maoy hunahunaon, ilang personal nga mga interes ang gipatigbabaw.

Ang akong gipaabot nga tubag gikan sa mga kongresista mao nga ilang ipasabot nganong angayang matangtang sa katungdanan si Duterte. Ug dili kay moingon nga napugos sila pagsunod sa kadaghanan tungod ug alang sa pundo nga ilang makuha.

Ang nakapait kay gigamit pang hinungdan ang mga kabus nilang mga molupyo nganong ilang gibaligya ang ilang pagkatawo. Kay kuno og di sila mosuporta mawagtangan sila og pundo alang sa ilang mga programa alang sa ilang mga konstituwente.

Dakong iskandalo ang maong rason tungod kay nagpakita ni nga dunay nahitabong subornohay sa kongreso aron palagputon si Duterte. Nganong kinahanglan silang manuborno kun kumbinsido nga lig-on ug dunay sukaranan ang reklamo?

Di malalis dunay angayang ipasabot ang bise president giunsa niya paggasto ang confidential fund sa iyang buhatan.

Apan dunay laing mga paagi unsaon pagpugos niya nga mohatag og kwentada sa gasto inay nga mosugal sa labihan ka samok ug divisive nga proseso sa impeachment.

Daghan og problema ang nasud nga angayang unahon pag-atiman sa atong mga opisyal inay nga maghaling og pagkabahin-bahin sa katawhan. Kun sa ilang tan-aw may kalapasan ang bise presidente, wa may nagpugong pagpasaka og kaso niya didto sa korte.

Gani ang National Bureau of Investigation (NBI) mirekumendar na kagahapon pagsang-at og kasong kriminal batok ni Duterte tungod sa giingong pagpanghulga niini sa Presidente, sa iyang asawa ug sa ig-agaw niini nga si Speaker Martin Romualdez.