EDITORYAL — Gikondisyon ang hunahuna

Nahimo ng parte sa kinabuhi sa mga tawo ang social media kada adlaw. Sa mga adunay mga cellphones, sigurado kining konektado sa internet ug kun dunay internet duna silay mga social media accounts ilabi na ang Facebook.

Ang Facebook ug Tiktok mao karoy labing giabuso nga social media platform sa halos tanang Filipino nga naghupot og mga cellphones.

Mao nga daghan karon ang nigamit sa Facebook sa pagpakatap og impormasyon para sa mga tawo, apan apil sab niini ang mga bakak, fake news, misinformation, disinformation, ug daghan pang uban.

Karon nga nagpadulong na ang eleksyon, nabantayan ang pagsikad og balik sa daghang mga posts bahin sa politika, dili lang pangampanya para sa mga kandidato kondili apil pud ang pagpangdaut sa mga kaatbang.

Kaning Facebook nga gipadagan sa Meta karon mas sopistikado kini kun itandi sa mga unang bersyon niini.

Bisan wala sugoa, ang Meta otomatikong molawog og mga contents o post nga kaparehas sa mga unang gipang like, gikomentohan, gi-follow o subscribe sa netizen.

Mao nga kada abli nila sa ilang social media account maglinya ang mga klase-klaseng content posts nga ilang ganahan kada adlaw o kada abli nila sa ilang account.

Wala makabantay ang mga netizens nga hinay-hinay nang gikondisyon ang ilang hunahuna. Bisan sayop, kay nagbalik-balik man magtuo ang netizen nga mao ni ang sakto.

Nagpasabot kini nga naimpluwensiyahan na ilang hunahuna aron paghimo og desisyon o opinyon sa mga butang nga ilang pirmeng mabasa diha sa social media.

Kung dili magmatngon ang mga users, ug dili mohatag og panahon aron pagpangita og laing tinubdan sa impormasyon bahin sa ilang mga nabasa, bisan sayop, bakak o fake news ilaha na kining tuohan nga tinuod ug maoy sakto.