Suan ug ubang Kongresistang mipirma mitug-an

Wala ikahimuot sa milyonmilyong diehard Duterte supporters ang pagpirma sa 215-250 ka kongresista sa dokumentong ipa-impeach si Bise Presidente Sara ‘Inday’ Z. Duterte. Nagduda ang kadaghanan kanila nga basig gipangbayaran og milyonmilyong kantidad ang kada kongresistang mopirma, hinungdan nga ang kadali ra niini napirmahan sa kinabag-an.

May mga dapit sa Mindanao nga ang mga giplastar-pabarog nga tarpaulin sa usa ka politikong molansar sa pagka-congressman, gihurot gyod og panglaksi sa mga gisakitang Mindawanon, kinsa nagpungasi ang kapungot tungod kay ang kanhi kaalyado-tinabangan sa mga Duterte, mipirma sab sa naasoyng Sara Impeachment.

Nangatarongan ang maong kongresista, nga tungod kuno sa kabalaka nga dili mahatagan og budget para sa iyang distrito, ang hinungdan nganong natental siya sa pagpirma. Pero, iyang kasingkasing, nagpabilin gihapong anaa sa mga Duterte ilabi na kang Inday Sara. Haskang atika, kongresistaha!  Aw, ang mga Dabawenyo, misamot kapaspas sa pagpanangtang-saliyab sa mga tarpaulin lakip na ang iyahang close-immediate relatives nga lumansaray napagan.

Usab, usa ka Kong. Lordan Suan sa 1st District, Cagayan de Oro, kanhi midaog tungod sa pagdkit sa mga Duterte, pinaagi sa usa ka press conference, miesplikar pod nganong napugos siya sa pagpirma pabor sa pagpa-impeach ni Sara. Labihan niyang depensa nga walay pinalitay sa pirma nga nahitabo. Boluntariyo ang iyang pagpirma ug walay tawong mipugos niya.

Nahadlok lang g'yud siya, nga ingkasog dili mouban sa mayoridad, kinsa namirma, basin ilhon siyang usa ka oposisiyon sa kasamtangang administrasiyon, diin delikadong mawad-an siyag budget o maulaw sa pagpangayog additional budget panahon sa panginahanglan para sa mga konsituwente sa iyang distrito. Maoy bug-at hinungdan nga miapil siyag pirma. Total, ang iyang gibuhat aron man mapadayon ang paghatod og serbisyo-hinabang pinansiyal o materiyal sa tanang lumolupyo sa iyang distrito. Pero iyang giklaro, dako gihapon siyag respeto sa mga Duterte.

Hinuon, nilang tanang namirma, adunay bug-at-makahuloganon kaayong mensahe-panahom si Inday. Matud niya, nganong magpa-press conference pa man ang namirma aron ipahayag ilang rason kon wala silay nahimong sayop?  Kay kon ang tawong mipirma mopagawas og mga cleansing story, aw nagpasabot lang kini, nga aduna kini nabuhat nga sala.

Pagkahait nga mensahe. Nakabutaltal gyod sa tanang balimbing ug walay kaugalingong baroganang linalang nga namirma!