EDITORYAL — Pun-i ang mga CCTV

Dako kaayo ang ikatabang aning pagmuntar og mga cctv cameras sa palibot. Makita na kini karon sa mga kabalayan, sa mga balay patigayon ug sa kadalanan.

Daghang mga krimen ang nasulbad tungod ani, ug daghan sab mga krimen nga napakgang tungod sab niini.

Apan subo lang nga daghan pa sa mga establisamento nga balay patigayon ang wala mamuhonan para sa ilang seguridad.

Samtang dili tuod 100 porsiyento nga mapakgang ani ang tanang matang sa krimen, dako kini og ikatabang sa imbestigasyon sa kapolisan tungod kay mabalikan og subay sa mga polis ang tanang mga cctv footage diha palibot diin nahitabo ang krimen hasta sab sa mga dalan nga posibleng maoy gigamit sa mga kriminal.

Apan ning bag-o, si Philippine National Police (PNP) chief Gen. Rommel Francisco Marbil gusto nga tanang closed-circuit television (CCTV) cameras konektado tanan ngadto sa ilang monitoring station.

Kay para niya, makatabang kini aron mapadali ang pagresponde sa mga otoridad sa mga lugar nga dunay padung mahitabo ug kasamtangang nahitabong krimen.

Kung konektado direkta sa ilang mga buhatan ang tanang cctv sa mga pribadong establisamento, dako kaayo gyud ang purohan nga dunay mga pinangita sa balaod o kadtong mga notadong mga kriminal nga masigpatan diha sa pundok sa mga tawo, anang paagiha masanta sila dayun kay usa lang ka tawag ngadto sa nagpatrolyang mga polis, siguradong masikop gyud dayun kini.

Maayo ang ideya nga gisugyot ni Marbil, kay usa sa problema gyud sa kapolisan mao ang kalangan nila og sinubayay sa tanang mga kopya sa cctv footages sa tanang mga establisamento nga naa niini diha sa palibot sa nahitaboan sa krimen.

Apan samtang maayo kining iyang sugyot, dili ba kaha niini malapas ang pribasiya sa mga establisamento? Dili ba aduna may mga trade secrets ang matag balay patigayon?

Usa pa, dili ba kaha kini makalapas sab sa pribasiya sa publiko nga mangadto aning mga establisamento?

Inay nga ang mga pribadong establisamento maoy sangunan ani, mas labing maayo nga awhagon ang tanang local government units nga pun-an ang ilang mga cctv nga gimuntar ug gi-monitor sa ilang monitoring stations, ug anhi sab mokonektar ang local PNP.