Demonyo miatake sa tunga sa karsada

Usa ka 31-anyos nga habalhabal driver ang gidunggab sa wala pa mailhi nga suspek sa tunga sa karsada sa N. Bacalo Avenue habig sa Barangay Kinasang-an, gani nakuhaan kini og video ug gi-upload sa usa ka netizen nga nag viral usab.

Makita sa video nga mora’g nagdunggab og hayop ang labaw pang animal nga suspek nga niadtong tungora daw nayawaan na, gitudhan niya ang biktima nga nakahigda na sa tunga sa karsada ug gidunggab sa makadaghang higayon.

Samtang makita usab nga gilabyanlabyan sila sa mga nangagi nga sakyanan wala gyuy nagpakabana nga motabang man lang unta.

Siguro gibati usab og kahadlok nga nakasaksi sa demonyo niadtong tungora. Mag ayo kon sila ang dunggabon.

Maayo nalang gani kay nadala sa tambalanan ang biktima, samtang ang suspek misibat ra usab human sa iyang gihimo.  Nahitabo kini pasado alas tres pa sa kaadlawon niadtong Sabado pero nakaabot sa kapolisan ang report usa ka oras na human mahitabo abg krimen.

Base sa imbistigasyon sa kapolisan, gibadlong sa biktima ang lalaki dihang gikuhaan siya og hulagway ug mitumaw ang away nga misangpot sa pagpanunggab.

Pastilan ka mabaw sa hinungdan nga naka-trigger sa suspek nga lubaon ang biktima, ang tawong makahimo niini kadtong ulipon sa kalag sa illegal nga drugas. Grabe naman maayo ang epekto sa pag gamit sa utot sa demonyo kay literal man gyud nga ma transform sila sa pagkayawa.

Sa sunodsunod nga krimen sa atong nasud karon nagkangilngig man.

Aniay amahan nga miihaw sa iyang partner ug duha ka mga anak ug ang hinungdan sugo gihapon sa illegal drugs.  Mao usab kini ang nahitabo niadtong lalaki nga nipatay sa mga tawo nga iyang natagboan sa Maribago dakbayan sa Lapu-Lapu nga nakapatay gyud og tulo ka inosenting tawo.

Gawas sa patay, nigrabe usab ang kawat ug pagpanulis nga wala nay pagpanagana ang mga suspek sa pagpamiktima bisan pa og dunay mga CCTV nga maka-record sa ilang krimen nga gihimo.

Makapangutana kita kon unsa ka luwas ang katawhan gikan sa kamot sa mga dautan?

Mora’g duhaduha na ta ani kong luwas pa ta, kong sa unsa bisan magabhian kita sa karsada dili ta mabalaka kay ang mga dautan nagtago man kay mahadlok mapatyan sa mga otoridad apan karon ingon ba gihapon ang ilang gibati?

Nakabalik na sila sa ilang gikamingawan nga binuhatan.

Busa mag amping kitang tanan, hugtan pa nato ang atong pag ampo aron panalipdan kita sa Labaw'ng Makagagahum.