Ang mga iro ni Lola Miguela

Nadismaya ang mga animal rights advocates apil na ang mga dog lovers o pet defenders sa pamahayag sa hepe sa kapolisan sa lungsod sa Dumanjug nga posibleng ang iro ang nagtangag sa ulo sa 83-anyos nga babaye nga napalgang wala nay kinabuhi sa iyang balay sa Barangay Candabong sakop sa maong lungsod hinungdan nga nabuwang kini sa iyang lawas.

Kini may kalambigitan sa ilang pagresponde ug pag imbestigar sa kamatayon sa tiguwang kansang lawas anaa na sa state of decomposition o pagkadugta ug posibleng ang mga iro niini ang nag kaon kay gigutom na sanglit patay naman ang ilang amo.

Gawas pa niini gitoohan nila nga natural death ang hinungdan sa kamatayon sa babaye kay hayan giatake sa sakit ug maoy naingnan sa iyang kamatayon.

Matud  sa experto sa kinaiya sa mga hayop nga si Dr. Alice Utlang usa ka beterinaryo nga loyal kaayo ang iro ngadto sa iyang amo, gani kong mamatay ang amo mag apong man ang mga iro nga giisip gani nga man's best friend busa dili katoohan nga mounay kini sa pagkaon sa lawas sa iyang amo.

Ugaling tinood kini kanang gutom na kaayo ang iro ug wala na gyuy pagkaon nga available, pero wala man kuno higti ang mga iro mamahimo ra kining makapangita og pagkaon pinaagi sa ilang pagsuroy suroy.

Duna usay punto ang animal expert kay mas loyal pa man gani ang iro kay sa tawo, dunay mga estorya nga mibuhis ang iro sa ilang kinabuhi aron lang maluwas ang kinabuhi sa ilang amo busa layo ra kuno ang theory sa kapolisan sa Dumanjug nga iro ang ihan-ok sa iro ang ingon niini nga panghitabo kay dili man makaestorya ang iro.

In fairness sa kapolisan sa maong lungsod aduna sab seguro silay gibasehan sa ilang findings kay sila man gyud ang nagsusi sa nahitabo, apan dili pud malikayan sa uban nga magduda ilabi na kadtong suheto sa kinabuhi sa ilang mga pets.

Dili kini unang higayon nga napasanginlan ang mga iro nga mihilabot sa ilang amo, una kadtong sa dakbayan sa Talisay nga si Spike nga maoy mipatay sa iyang amo apan nasuta nga wala diay, tungod kay patay na ang ilang amo nga nagbuy-od posibleng gikuhit sa iro ang lawas sa tawo kay gipukaw maong dunay traces sa kuko.

Ang makahatag gyud og katin-awan niining tanan ang pagpaubos sa forensic examination sa lawas sa mga mapalgang patay aron dili mapasanginlan ang si bisan kinsa apil na ang mga walay ikasukol nga mga hayop. Unta ang mga pulis ang mohingusog sa mga tagtungod nga ipaubos sa autopsy ang lawas aron masayran kon dunay foul play o wala.

Tungod kay dili makatoo ang pamilya nga walay nagpaluyo sa kamatayon sa tiguwang midangop sila sa NBI nga imbistigahan ang nahitabo nga maoy gitrabaho na karon sa ahensya diin libre ang tanan nga serbisyo sa pagpahigayon sa autopsy.

Makig alayon hinoon sila sa PNP  nga maoy unang nag imbistigar sa kaso. Pastilan atangan nato ang resulta, kong lahi man gani ang finding sa NBI segurado maluwas ang imahem sa mga iro nga napasanginlan ug sa samang higayon maghatag usab og negatibong imahe sa kapolisan nga nag imbistigar sa kaso.

Maayo unta kong magkatakdo ra ang findings nila aron walay mauwawan.