Impeach Sara rally binayran

Dili g'yud modaog ang mga bakakon batok sa mga matinud-anon. Napruyba kini human mitug-an ang nangreklamong senior citizens atubangan sa media, nga nabudol kuno sila sa pasalig sa mga organizers sa tagsatagsa nila ka barangay, kinsa misaad nga hatagan silag tag P1,000 basta moapil sa January 31, 20225-‘Impeach Sara rally’ nga gipanghingusgan sa nagkahiusang puwersa sa Pinklawans-Dilawans ug ubang pro-bad-governance groups nga pinangulohan ni Antonio ‘Sonny’ Trillanes.

Ang pait, kay gawas sa giantos nilang kainit, nakagasto pa silag pamlite ug sa ilang pagkaon sanglit maoy sabot, nga apil na kini sa maong P1,000. Ubay-ubay ang nangreklamo. May pipila ang nangandoy, nga bisan ulian na lang sila sa pamlite ug sa ilang pagkaon, maarang-arang na lang unta.

Usab, may grupo sa mga batan-ong miapil, kinsa dihang gipangutana sa media kon nasayod ba nga ang ilang gitambogang rally para i-impeach si Sara, usa ray ilang tubag. Wala sila mahibalo. Kay igo rang misunodsunod ilang panon sa mga tam-is kaayog dilang organizers, kinsa maoy midala-kombinse nila.

Si Trillanes nanghambog nga miabot kunog 40K ang nanambong. Kana kon siyay pasultion. Pero kon mga diehard Duterte supporters, pa? Dili makaabot og 10K, uy! Apan ibutang nato nga husto ang ihap ni Trillanes.  Aw, abog ra kini sa milyonmilyong nanambong sa Iglesia ni Cristo peaceful rally, diin sa wala pa ang Impeach Sara rally, iya nang gibandilyo nga palabwan pa niya ang gidaghanon niini.

Sa bagay, hagbay rang nawad-ag kredibilidad si Trillanes sa panan-aw sa mga nagpakabanang katilingban, kinsa wala na gayod mosalig kaniya. Tingale, sa mga tawong susama niyag balhibo, ‘on’ pa siya, pero sa mga maigmat? Hagbay ra siyang gi-off!

Luoy ang misalmot og Impeach Sara rally, labi na kadtong mga seniors nga nangailad sa pasalig nga bakak sa nahisgotang rally organizers.  Sanglit sila napugos ra tungod kay nangayawat intawon nga makadawat og P1K. Ug dili tungod kay gusto nilang ipa-impeach si Sara.

Gani, gumikan sa naglanoglanog balita nga ang Trilanes: ‘Impeach Sara rally’ binayran diay, misamot kadaghan ang mga dumadapig ni Inday Sara, kinsa bisag gitabangag labayg lapok sa administrasiyong Marcos-Pinklawans-Dilawans, wala gyod maunsaay ang mga pako sa agila.

Hinunoa, padayon ang paglupad niini, pataas…ug pataas!