Nabusog ang mga iring
Atol sa pagdungog sa kongreso kabahin sa anomaliya sa suplay sa inangkat nga bugas, gibutyag ni DOF Director Jolly La Rosa nga ang hinungdan sa pabilin nga pag-taas sa presyo sa bugas mao ang manipulasyon nga gihimo sa mga cartel ug mga bulay-og nga magpapatigayon. Luyo sa saad sa administrasyon nga mobarato ang bugas, ug sa pagpangandak sa DA nga taralon ang mga cartel nga nagmaniobra niini, wala gihapon masumpo ang maong dangan. Haum ang panultihon nga, “Kon masubornohan ug mabusog ang mga iring, walay mopakgang sa paghudyaka sa mga ilaga.” Muleeng!
Magpa-sagpa na lang!
Alang kang Presidente Marcos, Jr., dili na kinahanglan nga mopadala ang Philippine Navy og mga warships ngadto sa West Philippine Sea bisan pa man sa padayong ka-agresibo sa China sa giilogan nga luna kay wala man kuno kita makig-gubat sa China. Daw verso sa bibliya ang gisagop nga polisiya sa presidente nga nag-ingon, “kon sagpaon ang imong usa ka aping, ipasagpa usab ang pikas nga aping.” Ang problema lang kay dili man Katoliko ang China. Matud pa sa akong amigo, “Aaw, kon mao kana, magpa-sagpa na lang ta. Tan-awon nato og kinsay pul-an, ang nanagpa ba o ang gisagpa.” Fezteleern!
Daghan’g pinaskohan
Gimanduan ni Presidente Marcos, Jr. ang DBM ug ang DepEd nga hatagan ang mga magtutodlo sa publikong tulonghaan sa ilang service recognition incentive (SRI) agi og pag-ila sa ilang mahinungdanon nga papel sa pag-umol sa kabatan-onan nga mamahimong mapuslanon’g sakop sa katilingban. Gihangop pag-ayo kini’ng SRI sa mga magtutudlo kinsa sagad adunay daghan’g loan nga gisagubang. Komedya pa sa akong pag-umangkon, “Hayahay karong panahona si Maam kay gawas sa SRI, daghan pud sila’g madawat nga pinaskohan gikan sa mga ginikanan nga gusto’ng ma-honor ang ilang anak.” Madahaan!
Dili unta angayan
Nagkadaghan ang mga lokal nga kagamhanan ang gipasidunggan karong tuig 2024 sa Seal og Good Local Governance (SGLG), usa ka inisyatiba sa DILG sa pag-ila sa LGU performance kabahin sa transparency ug accountability. Garbo sa usa ka LGU ang mahatagan sa maong pasidungog. Apan ang pangutana, mohaum ba kaha ang pasidungog nga nadawat sa kahimtang ug kalidad sa pagkinabuhi sa ilang lungsod? Mao kana’y giingon sa akong apohan samtang gipasidunggan siya isip usa ka maayong lungsodnon nga, “Dili ko angayan niining maong pasidungog apan, hinoon, aduna pud koy arthritis ug dili man pud unta ko angayan ni’ng maong sakit.” Ateerr!
Repeat again
Nahingawa ang kontraktor sa rubberized oval track sa Cebu City Sports Center (CCSC) nga ang umaabot nga Cebu City Olympics makahimo na usab og bag-o ug dugang kadaot sa maong pasilidad. Adunay basehan ang kahingawa sa kontraktor. Apan kon buot huna-hunaon, siya ra usab ang mabasol tungod kay wala man niya taronga sa unang higayon pa lang ang pagbuhat sa iyang gimbuhaton. Ang sangputanan sa tinonto’ng trabaho ug ang pagpunay’g usab-usab niini nahulagway sa pagya-komedya nga nag-ingon, “Repeat again twice for the second time.” Pagkatoytoy!
- Latest