EDITORYAL - Imperpektong proyekto

Usa sa yawe sa malampusong paglapad sa emperyo sa Roma sa karaang panahon, gawas sa ilang militar, mao ang ilang imprastraktura.

Ang ilang imprastraktura mga nindot nga arkitekto, desinyo, sa mga higanteng mga edipisyo, kolesiyo, viaducts ug daghan pang uban nga gani ang uban hangtud karon naa pa ug gihimo nang atraksyon sa mga turista.

Ang nakapadali ug nagpalig-on sa ilang emperyo mao ang ilang mga karsada. Sila mao ang labing unang tawo sa kalibotan nga naghimo og mga dalan nga gipamutangan og mga bato padung sa mga lugar kutob sa ilang ginsakupan gikan sa Aprika, Uropa ug coastal kingdoms sa Mediterranean Sea.

 Ang maayong mga dalan dako og papel sa pagpalambo sa ekonomiya sa mga lugar kay anhi man moagi ang mga produkto ug komersiyo.

Mao nga bisan asang malambuong mga nasud sa kalibotan karon duna gyuy maayong road networks. Dinhi sa Pilipinas dunay klase-klaseng imprastura apil na ang mga dalan. Dinhi sa Pilipinas, ang gobiyerno pinaagi sa Department of Public Works and Highways maoy mangita og kontraktor para niini. Usahay ang mga local government units mopa bidding sab para sa ilang mga lokal nga proyekto sama sa mga kanal sa mga sudlonong bahin sa ilang hurisdiksyon nga di sakop sa DPWH.

Sa nakalabay nga administrasyon, gitutokan ang “build, build, build” program kay nakita nga pinaagi niini, makatabang gyud og maayo sa paspas nga paglambo sa nasud. Ang kadaghanan inutang pa gikan sa China nga karon wala nangahuman tungod aning kasungian sa West Philippine Sea.

Dunay mga proyekto nga gipadayon hangtud sa bag-ong administrasyon sama sa flood control projects, gikan sa ripraps hangtud sa mga kanal diha sa mga kadalanan aron mapugngan ang baha apan pribadong kontraktor ang nitrabaho. Apan daghan ang nagbagulbol kay dunay nangahunlak o natumpag, samtang dunay mga nangahuman tinuod apan mura man sab hinuon naghimo og laing problema kay nahimong libaong na hinuon ang mga dalan human sa paghimo sa mga kanal.

Ang nakaparat niini, gidawat ra man gihapon sa DPWH, samtang ang mga LGUs wala lang sab magpakabana bisan peligro kaayo sa mga konstituwente nila kining mga imperpektong mga proyekto.