Pahimulos

Anaa sa 18.1 porsiyento ang gidaghanon sa mga kabos nga nahimutang ubos sa national poverty line niadtong tuig 2021. Kini ang gitugan sa datus sa Asian Development Bank.

Basi sa national poverty line sa Pilipinas gikinahanglan sa pamilya nga adunay lima ka mga sakop ang kantidad nga P13,873 matag buwan aron mapalit niini ang ilang pagkaon ug dili pagkaon  nga panginahanglan sa pamilya.

Sa gipahigayon nga pagtuon sa OCTA Research nga ilang gitawag og Tugon ng Masa sa unang bahin ning tuiga (gikan sa Marso 11-14), ang mga tawo nga miangkon nga sila kabus anaa sa 42 porsiyento mas ubos kun itandi sa 45 porsiyento sa susamang survey nga gihimo niadtong tuig 2023.

Ang gidaghanon sa kabus sa nasud mao ang hinungdan sa pagpasiugda sa mga magbabalaud ug gobiyerno sa mga programa nga maghatag og ayuda sama sa TUPAD o Tulong Pangkabuhayan Alang sa Disadvantage, AICS o Assistance to Individuals in Crisis Situations ug 4Ps.

Sa sinugdanan maayo ang tumong pero kun imo nga palawman sa pagsabot makahimo kining tapolan sa mga tawo nga makadawat sa ayuda. Gawas nga makapatapolan, gipahimuslan pod kini sa mga politiko. Gikabayan sa mga politiko ang mga programang ayuda ilabi na karon nga nagkaduol na ang Mayo 12, 2025 nga bugnong lugaynon.

Ato nang nakita ang nagbaha nga mga ayuda gikan sa mga nagdumala sa mga lokal nga kagamhanan diin diha gipaagi ang mga ayuda.gikan sa nasudnong kagamhanan.

Sa lalawigan sa Bohol nabaniog ang paghatag sa programang TUPAD ngadto sa mga makadawat niini nga sama sa usa ka political rally tungod kay mitupad pod kanila ang mga politiko.

Duha ra ang atong dudahan nga nagpagawas sa video, siya nga wala makauyon sa gihimo sa mga politiko sa Bohol ug ang mga kaatbang nila sa politika.

Aron dili makabayan sa mga politiko ang programang ayuda, kinahanglan nga dili pod pakabayon sa mga nagdumala niini ang mga politiko kay kun sigihan nila kini sa pagpakabayo kanunay gyod silang makabayan niini.