EDITORYAL - Special treatment

Ning bag-o naa na sab ning mga estoryang ‘special treatment’ karong nadakpan na pagbalik ang wanted nga gitaktak nga mayor sa Bamban nga si Guo Hua Ping alyas Alice Guo kinsa giimbestigar tungod sa kalambigitan sa Philippine Offshore Gaming Operation (POGO).

Nigawas sa mga balita nga ang PNP pinaagi sa mga kadagkoan niini mipasabot ug misaad sa katawhan nga walay special treatment nga madawat si Guo samtang siya gikostudiya.

Nganong naa man gyuy ingong aning mga pagduda ang katawhan nga kun dunay mga high-profile nga detainees  magduda dayon ang publiko basin dunay especial treatment.

Una sa tanan, dili ni mogawas ang mga ingon aning pagdudang kun walay sumbanan o walay nahitabong sama niini kaniadto.

Busa, di malikayan nga duna gyuy magduda tungod kay duna man gyuy mga kurakot nga naa sa gobiyerno nga bisan unsaon og panghimakak, dili gyud mawala kay matag-karon ug unya duna may masakpang nagbuhat.

Si Guo gikatakdang ipatawag pagbalik sa Senado sa nagpadayung inquiry bahin sa POGO ug daghan ang naghinamhinam nga ipangwadwad niini ang mga impormasyong gikinahanglan nga gipangita sa mga senador ug ilabi na sa publiko.

Lakip sa impormasyon nga giatangan mao ang pagbutyag unya ni Guo kun si kinsa ang mga dagkong opisyal sa nasud, ilabi na sa nakalabay nga administrasyon nga maoy responsible nganong nakasulod kining POGO dinhi bisan og daghan ang nipasidaan sa peligrong dala niini sa nasud.

Sa pagkatinuod, sa pagpasulod dinhi sa POGO, legal kini ug dunay mga gisunod nga mga proseso subay sa balaod. Apan sa pagdagan sa mga katuigan, nagkadaghan ang mga nagpadagan niini dinhi ug wala na makontrol ang pagbutho murag mga uhong.

Apan sa pagsulbong aning mga guerilla POGO operations nga anha gibuhat dili lang sa mga dagkong complexes o resorts, kondili bisan sa mga giabangang mga apartment o housing units sa mga esklusibong subdivisions, misaka sab ang ubang mga krimen.

Kaning mga krimen naglakip sa kidnappings, extortions, human trafficking, ilegal nga drugas, hasta pagpanglugos. Nagdala kini og dakong problema sa nasud.

Siguradong dili lang mga langyaw nga Chinese ang financiers aning POGO, duna gyuy mga Pilipino nga ilang kasosyo ani ug dunay mga opisyales nga nagdawatan og kwarta gikan aning ilang operasyon nga kinahanglang mahibaw-an.