POGO hub

Ang pagdiskubre sa illegal nga Philippine Offshore Gaming Operator (POGO) hub sa Lapu-Lapu City, diin kapin sa 162 ka mga langyaw nga mga trabahante ang re-scued sa otoridad, nagpakita sa usa ka dakong problema nga giatubang sa atong komunidad kabahin sa ilegal nga sugal.

Ang pangutana karon mao kung kinsa ang angay’ng manubag sa presensiya sa operasyon sa POGO sa maong siyudad. Ang mga lokal nga opisyal ug kapolisan adunay dakong responsibilidad pagmonitor ug pagsanta sa mga illegal nga kalihokan sa ilang nasakupan.

Ang wala pagkamatikod sa mga kalihokan sa usa ka hotel nga nag-host sa illegal nga POGO operations, bisan pa nga kini duol sa barangay hall ug police station, usa ka dakong kakulangan sa pagpatuman sa balaod.

Ang mga otoridad sa nasyonal nga lebel, sama sa National Bureau of Investigation (NBI) ug Presidential Anti-Organized Crime Commission (PAOCC), adunay dakong papel sa pagdiskubre ug pagdakop sa mga responsable sa POGO operations.

Apan ang ilang kalampusan nagpakita usab sa kakulang sa koordinasyon ug kahuyang sa lokal nga otoridad pagpugong sa mga illegal nga kalihokan.

Ang pagdiskubre sa POGO hub sa Lapu-Lapu City nag-abli sa posibilidad nga adunay daghan pang mga illegal nga POGO operations sa ubang bahin sa Cebu.

Ang mga taho nga adunay mga POGO operators nga gikan sa Pampanga ug Tarlac nga mibalhin sa Lapu-Lapu City nagpakita nga ang problema dili limitado sa usa ka lugar lamang. Kini nagkinahanglan ug mas hugot nga pagmonitor ug koordinasyon tali sa mga lokal ug nasyonal nga otoridad aron mapugngan ang pagkatag sa maong illegal nga kalihokan.

Ang pagkadiskubre sa POGO hub sa Lapu-Lapu City usa ka wakeup call alang sa tanang otoridad ug opisyal sa gobiyerno. Kinahanglan nga adunay mas hugot nga pagpatuman sa balaod ug mas maayo nga koordinasyon tali sa mga lokal ug nasyonal nga ahensiya aron mapugngan ang pagkatag sa mga illegal nga kalihokan.

Ang pagpakabana sa komunidad pagreport sa mga kadudahang kalihokan usa usab ka dakong tabang aron mapugngan ang pagkatag sa mga POGO operations sa nasud.