Autopsy kit expired na

Gitug-an sa hepe sa kapolisan sa dakbayan sa Sugbo, Police Col. Antonieto Canete, nga ipa-autopsy pagbalik ang patay nga lawas ni Charina Relativo tungod kay ang nagamit nga kit sa pag autopsy expired na.

Apan sa eksklusibo nga pakighinabi sa Xfm 88.3 Cebu ngadto sa hepe sa Regional Forensic Unit, Police Lt. Col. Lara, iyang giingon nga wala na kinahanglana ang pag autopsy og balik sa patay nga lawas ni Charina tungod kay ila na kining gipaubos sa DNA test nga mas labing kasaligan kun ikomparar sa serology test.

Giingon ni Lara nga wala lang mapasabot og maayo ni Col. Canete ang mga sakop sa media mahitungod sa re-autopsy.

Una nang giingon ni Col. Canete nga negatibo ang resulta sa autopsiya mahitungod sa pangutana, nahilabtan ba sa suspetsado nga si Darren si Charina. Apan giingon sa hepe sa kapolisan sa dakbayan sa Sugbo nga dili konklusibo ang resulta sa autopsy tungod kay expired ang kit nga gigamit.

Sa giingon nga extra-judicial ni Darren, iyang giingon nga wala niya mahilabti si Charina tungod kay misukol kini.

Ang resulta sa autopsy konpirmasyon na unta kini sa gitugan ni Darren nga wala niya mahilabti ang biktima apan tungod sa expired nga kit nga gigamit, naalanganin kini.

Ang giingon sa hepe sa Regional Forensic Unit nga dili na ipaubos og balik sa autopsy si Charina tungod kay ila nang gipaubos sa DNA ang mga samples nga nakuha nila sa pag autopsy sa patay nga lawas ni Charina. Usa kini ka paagi sa pagpanalipod sa iyang buhatan nga migamit og expired na nga kit.

Pagpanalipod kini sa iyang buhatan nga nagdinanghag sa ilang trabaho. At least, sa paghimo sa DNA matabonan gamay ug malikay sa kauwawan ang buhatan nga gipangulohan ni Lara.

Manghinaut lang ko nga dili na mausab sa mga kawani sa Regional Forensic Unit ang pag gamit ig expired nga kit ug aron maseguro mas maayong ilabay na ang mga expired nga kit ug kun dili man ilabay, ipadaplin kini aron dili na magamit.