Mga kulorom midagsang

Ang kadagkoan sa Federation of Cebu Transport Cooperatives mibutyag nga daghan sa mga karaang PUJ nga gibaligya nila ang gipabiyahe kini karon sa mga nakapalit sa sakyanan.

Mao kini ang gibutyag ni Ellen Maghanoy, ang chairman sa kahugpongan sa mga tag-iya og Modernized Public Utility Jeepney (MPUJ) dinhi sa Cebu City.

Ang pamahayag ni Maghanoy gidasonan usab ni Priscila Cabonita, nga maoy chairman sa Lahug-Apas Transport Cooperative (LATRANSCO) ug apil na si Roberto Orilla nga maoy chairman sa Pit-os Talamban Mandaue Transport Cooperative.

Ilang gibutyag nga dihang gipamaligya nila ang ilang mga traditional PUJ, kay nakapalit na man sila og mga MPUJ, dunay mga nakapalit nga gipamasaheroan ang maong mga units.

Mao diay kini ang rason nga misamot kahuot ang atong mga karsada kay anaa na ang mga MPUJ, ug anaa gihapon ang mga karaang PUJ nga nanagan nga ang mga tag-iya way kahadlok.

Kadtong mga karaang PUJ nga gibaligya, way apil sa pagbaligya ang prangkisa, apan ambot og giunsa nila sa nakapalit nga makahimo sila og mga peke nga prangkisa.

Matud ni Maghanoy nga pagkakaron wa na may “substitution” sa mga prangkisa nga karaang PUJ ang gamiton. Kon dunay “substitution” kinahanglan nga MPUJ na.

Awhagon nako si Regional Director Glenn Galario sa Land Transportation Office (LTO)-7 nga mohimo siya og massive operation batok niining ubay-ubay nga mga kulurum nga PUJ.

* * *

Ang mga tag-iya og MPUJ dinhi sa Sugbo ug bisan sa ubang bahin sa nasud, nagpahigayon og protesta kaniadtong Lunes. Nagmartsa sila gikan sa Fuente Osmeña paingon sa LTFRB-7 regional office sa Echavez Street.

Miprotesta ang mga MPUJ operators sa lakang sa mga Senador nga gustong ipasuspenso ang pagpatuman sa Public Utility Vehicle Modernization Program.

Ubos sa maong programa sa kagamhanan, kadtong mga karaan na nga PUJ nga nag-edad na og 15 ka tuig ang sakyanan, did-an na sa pagpabiyahe isip PUJ, ug ilisan na og modernized jeepney.

Ang gitawag nila’g MPUJ mao kanang mga gagmay’ng bus nga magdagan, ug sagad niini dunay air-conditioning units nga bugnaw kaayo ang mosakay.

Husto si Maghanoy nga tinonto ang gihimo sa mga Senador nga sila nga mga MPUJ operators igo lang mituman sa balaod nga gisugdan pagpatuman sa administrasyon ni kanhi Presidente Duterte, apan karon gusto nilang ipasuspenso.

Sa 23 ka Senador, si Senador Risa Hontiveros ra maoy wa mopirma sa resolusyon nga nag-awhag ni Presidente Bongbong Marcos nga dili na ipadayon ang implementasyon sa PUJ modernization.

Naglaom ang mga MPUJ operators nga unta dili aprobahan ni Presidente Marcos ang resolusyon sa mga Senador ug ipadayon gyud ang pagpatuman sa PUJ modernization program.