Politikanhong kaba-kaba

Atol sa pagsaulog sa ika-455 ka tuig nga anibersaryo sa lalawigan sa Sugbo, ang mga mayor sa Sugbo ug mga gobernador sa silingang probinsiya ug rehiyon nanumpa sa ilang suporta ngadto kang Presidente Marcos ug sa iyang panawagan sa panaghiusa. Dili kaha kining gipakita nga suporta sa mga politiko ngadto sa presidente kutob lamang sa umaabot nga midterm election?  Inig saylo na sa maong panahon, diin padulong na’ng mapupos ang termino sa presidente ug mokunhod na ang iyang impluwensya, maghinay-hinay na usab og pangatulog ang mga ulod-politiko aron mahimo’ng mga politikanhong kaba-kaba inig abot sa panahon.  Fezteleern!

Ang psa ra’y nalipay

Segun sa pamahayag sa Philippine Statistics Office (PSA) Chief nga si Claire Dennis Mapa, mokunhod ang retail price sa matag kilo sa bugas gikan sa P6 ngadto sa P7 karong bulan sa Agosto tungod sa pagkunhod usab sa taripa sa bugas.  Gituohan nga  ang retail price sa bugas anaa na lang sa tag-P50 ngadto sa P55 matag kilo depende sa klase.  Ang  gipangandak sa atong mga opisyales nga barato’ng bugas, halayo ra sa gihandum sa katawhan, ug labi pa’ng halayo sa gisaad sa presidente nga tag-P20 ang kilo. Matud pa sa mga akong amigo, “Ang PSA ra gyud ang nalipay sa tag-P55 matag kilo nga presyo sa bugas.” May’pag moligeed!

May’pag nagsige’g chinese garter

Mohatag ang PAGCOR ngadto kang Filipino gymnast Carlos Yulo og P20 milyones isip ganti tungod sa pagdaug niini og duha ka Olympic gold medals sa men’s artistic gymnastics.  Panahon, kahago ug sakripisyo nga gigugol ni Yulo una niya nakab-ot ang iyang kalampusan.  Tungod sa mga nadawat ni Yulo nga mga pinansyal nga ganti, nakatuaw ang akong silingan nga “Kon nahibaw-an pa, may’pag wala ko muondang og duwa’g Chinese garter ug tumbling-tumbling sa kasagbotan gikan pagkabata.” Pagkatoytoy!

Ibaligya na lang

Gimonitor karon sa kagamhanan ang giingon nga mga Chinese structure ug mga military equipment nga gitukod sa China diha sa Subi o Zamora Reef, lugar nga kabahin sa atong continental shelf duol sa Pag-asa Island sa Palawan.  Bisan sa mga pabor nga pamahayag sa United Nations kabahin sa atong pagpanag-iya sa maong mga lugar,  igo ra ang atong mga opisyales pagpangandak nga gimonitor nato ang ilang padayon’g pag-okupar niini.  Kon kutob ra kita sa pag-monitor, sakto ang sugyot sa akong amigo nga, “Kon di na gyud nato mabawi sa China ang giokupar nila nga mga lugar, may’pag ibaligya na lang kini ngadto kanila.” Madahaan!

“Let us see the scattered”

Gipanghimakak ni Konsehal Nestor Archival ang mga spekulasyon nga kon modaug siya pagka-mayor sa dakbayan sa Sugbo, dili siya mag-agad lang ug labaw’ng dili  siya mahimo’ng kiko-kiko (puppet) lamang ni kanhi Mayor Tomas.  Katuohan ang mga pamahayag ni Konsehal Archival tungod sa iyang gipakita nga labok sa konseho ug sa iyang matang sa pagkatawo.  Ni’ng kahimtanga, ato lang paabuton ang lintunganay sa iyang pamahayag.  Matud pa sa pagya, “Let us just see the scattered (Makita ra unya ang katag).” Muleeng!