Tag otso milyones ang presyo

Nabayran og tag walo ka milyon ka pesos ang 10 ka mga suspect-witness sa kasong pagpatay ni Roel Degamo nga Gobernador sa Negros Oriental. Kini ang hinungdan nganong mibaliktad sa ilang mga pamahayag mahitungod sa kaso ang napulo ka mga suspect-witness sa kaso. Mao ni ang gitug-an ni Justice Secretary Jesus Crispin Remulla.

Sa miaging pipila ka adlaw namasangil ang  napulo ka mga suspect-witness sa kaso nga gibun-og o gi-torture kuno sila aron mapugos sa pag angkon sa ilang partisipasyon sa krimin ug sa paglakip ni kongresista Arnulfo Teves Jr. sa kaso.

Gipasanginlan ni Justice Secretary Remulla ang kanhi Justice Assistant Secretary nga si Renante Orceo nga abogado sa suspetsado nga si Marvin Miranda (body guard ni Kongresista Teves Jr.) nga maoy nimaniho sa pagpabaliktad sa mga suspect-witness pinaagi sa pagtanyag og P8 milyones matag usa kanila aron mobali sa kaso.

Nanghimakak si Arceo sa pasangil sa DOJ Secretary. Miapil usab sa pagpanghimakak ang ubang abogado sa mga suspect-witness. Walay basihanan ug walay kamatuoran ang pasangil ni Secretary Remulla.

Kun ugaling adunay lig-on nga basihanan si Remulla sa iyang pasangil, puwede niya nga pasakaan og kasong kriminal ang  mga abogado sa mga suspect-witness nga mibaliktad sa kaso. Puwede usab niya nga ipa-disbar sa Korte Suprema ang mga abogado tungod kay nakahimo kini og kalapasan sa ilang Code of Ethics.

Apan kun wala siyay basihanan ug igo lang misagop sa kasayoran nga walay kamatuoran, maingon nato nga ang Justice Secretary nag marites o tsismoso.

Niining maong dagan, unsa man ang mahitabo sa kaso ni Gobernador Roel Degamo? Makakuha pa kaha siya og hustisya ug ang uban nga gidamay sa pagpatay kaniya?

Dakong hagit sa Department of Justice karon ang paghatag og hustisya sa kamatayon sa gobernador ug sa laing gidamay sa pagpatay kaniya.