Pagsukwahi sa sulti ug buhat
Laing pahinumdom: Nga way unod ang gibalikbalik nga pasalig ug pag-awhag og panaghiusa ni Presidente Ferdinand Marcos Jr. Kay bisan ang iyang administrasyon managlahi ang direksiyon. Sa duha ka buwan nga kalihokan gahapon, niluwat siya og mga mensahe nga direktang nisukwahi sa iyang binuhatan:
• Nipasalig siya sa mga negosyante nga tarungon ang sistema sa buhis aron molambo ang nasudnong ekonomiya; ug
• Nisaad sa Overseas Filipino Workers (OFWs) nga iyang panalipdan ang ilang interes pinaagi sa pakigsuod sa mga tagduma sa gobyerno sa mga nasud nga ilang nahimutangan.
* * *
Iyang mensahe sa buhis atubangan sa mga opisyal sa Federation of Filipino Chinese Chambers of Commerce & Industry Inc. (FFCCCII) di maoy una. Mas hilas ang iyang awhag atol sa paglusad sa National Tax Campaign sa Bureau of Internal Revenue (BIR) niadtong Pebrero ning tuiga: “Bayad sa saktong buhis sa saktong panahon.” Nahibawo tang tanan unsay aktuwal niyang gihimo sa mga obligasyon sa pagbayad og buhis:
• Nakonbikto siya niadtong 1995 sa kapakyas pagbayad og income tax ug pag-file og income tax returns sa siya pay bise gobernador ug dayon gobernador sa Ilocos Norte sa 1982, 1983, 1984 ug 1985; ug
• 34 ka tuig nang gilikay-likayan sa ilang pamilya ang pagbayad sa ilang utang sa estate tax nga P23 bilyones niadtong 1989 nga niburot na ngadto sa P203.8 bilyones sa labing uwahing demand letter sa BIR niadtong Disyembre 2021.
* * *
Gisukwahi sab sa presidente ang iyang pasalig pakigsuod sa mga nasud nga gitrabahoan sa mga Pilipinhon. Napakyas ang iyang administrasyon sa pagpasabot sa gobyerno sa Kuwait sa panginahanglan sa pagpanalipod sa OFWs gikan sa mga pangabuso.
Gawas nga napakyas pagpanalipod sa OFWs sa wa pa sila lugosa, patya ug gitambog ang mga patayng lawas sa refrigerator ug disyerto, wa siya katarung sa pagpasabot nga ang pagsuspenso sa deployment sa bag-ong domestic workers ug pagbutang og shelter sa OFWs nga gi-abusohan gitumong batok sa abusadong Kuwaiti employers, di sa pagpakauwaw sa gobiyerno.
Ang resulta? Nibawos ang Kuwait pag-ban sa dul-an sa libo ka bag-ong OFWs (nga naka-prenda ug nakapangutang na para sa taga liog nga placement fees ug ubang bayranan) ug nidawat sa mga trabahante gikan sa Ethiopia, Kenya ug Uganda.
* * *
- Latest
