Bahad sa contractor

Piligro nga mosamot pa ang kalangan sa Cebu Bus Rapid Transit (CBRT) project kun ihinayon sa Chinese contractor ang bahad nga mohunong sa pagtrabaho sugod karong Hunyo 15 nunot sa kapakyas sa Department of Transportation (DOTr) pagbayad sa gisabotan nga mobilization fund.

Matud sa contractor nga gikinahanglan nila ang 10 porsiyento sa total nga presyo sa kontrata aron magamit pagsugod sa proyekto.

Niadto pang Pebrero nagsugod ang Hunan Road and Bridge Company Ltd. pagtrabaho sa Package 1 sa proyekto nga mokantidad og kapin sa P900 milyones. Apan hangtud karon wala pa kabayad ang DOTr sa 10 porsiento nga mobilization fund.

Ambot unsay giatiman sa maong ahensiya nganong labihan man gyud kainutil niini. Hapit tanang serbisyo nga ubos sa DOTr duna gyuy problema.

Gikan sa airport hangtod sa mga plaka sa sakyanan ug driver's license labihan ka problemado. Ambot duna naba kahay ID card nga available alang sa mga moparenew sa ilang driver's license.

Balik ta sa BRT, di ko kasabot nganong wala dayon kabayad ang DOTr nga unta dugay naman na pundo ang kwarta nga giutang sa gobiyerno alang sa maong proyekto.

Nagsige naman gani ta og bayad og penalty kay wala nato magamit dayon ang pundo tungod sa kalangan sa pagsugod sa proyekto.

Ang matag-adlaw nga kalangan sa paghuman sa proyekto nagpasabot ni og lugway sa kalbaryo sa trapiko alang sa publiko.

* * *

Niadtong Martes nipatawag og special meeting ang committee sa dakbayan sa Sugbo nga maoy gitahasan sa right of way acquisition alang sa BRT project. Tungod kay daghan ang interesado ug buot masayod sa kalamboan sa proyekto, akong gipadad-an og reporter sa The Freeman aron pag-cover sa tigom.

Pero ambot unsay nakaon sa mga sakop sa naasoy'ng komitiba, ilang gipagawas ang reporter. Kanus-a man mahitabo nga di mahimong makasaksi ang publiko sa usa ka tigom nga nagtuki mahitungod sa usa ka dakong proyekto sa gobiyerno?

Unsa may gitagoan sa mga sakop sa committee on lot and road right of way acquisition sa dakbayan nga mahadlok man sila sa media?

Tungod kay di man mo gusto nga dunay reporter nga maminaw sa inyong meeting diin gibayran mo og P1,500 matag-usa isip honorarium gamit ang buhis sa katawhan, palihog tubaga og nganong gikinahanglan ang dakong kantidad alang sa right of way.

Unsa may right of way nga kinahanglang paliton sa gobiyerno nga ang gigamit nga BRT lanes existing man nga road network?

Dili ba nga igo ra man gibungkag ang island sa Osmeña Boulevard ug gibuhatan og BRT lane? Nganong kinahanglan i-acquire ang luna nga karsada nang daan ug gipanag-iya na sa gobyerno?