Nalibre ang colurom?

Sumala sa legal opinion nga giluwatan sa Department of Justice (DOJ), walay kagahum ang LTFRB sa pag-dakop, pag-impound o pag-dispose sa mga colurom nga mga sakyanan gawas lang kon i-deputize ang LTFRB sa LTO o sa PNP.  Ni’ng tataw nga opinion sa DOJ, hinaut nga magiyahan na ang LTFRB ug hunongon na ang naandang binuhatan.  Apan dili usab pagasabton sa mga tag-iya sa colurom nga sakyanan nga libyano na sila makapadagan sa kadalanan.  Daghan ang maantigo lage momaneho’g sakyanan apan wala masayod sa balaod sa kadalanan ug dili man gani maantigo mogamit sa lawn mower o ba kaha sa vacuum cleaner.  Madahaan!

“Under Construction”

Mihulga ang contractor sa Cebu Bus Rapid Transit (CBRT) Package 1 nga mohunong kini sa ilang trabaho kon ang Department of Transportation (DOTr) dili mobayad sa pasiunang 10% nga mobilization fund.   Adunay katungod ang contractor pagpangayo sa 10% mobilization fund apan susihonon pa kon igo ba kining basehan nga mohunong siya sa pagtrabaho tungod kay dili man bayad sa nahuman nga trabaho (progress billing) ang gipangayo niiini. Ni’ng hulga sa contractor haum ang panultihon nga “Ang dalan paingon sa kalampusan kanunay lang nga ‘under construction.’”  Fezteleern!

Motubo bisan dili bisibisan

Gikataho nga adunay pipila ka mga online lending firms ang migamit na’g tinonto nga pamaagi sa pagpangolekta sa bayad sa mga nakautang kanila nga nakapalta sa ilang datahan.  Usa sa maong lending firms mipadala na og bulak sa patay samtang laing utangan nakadawat gayod og lungon tungod lang sa pagpalta sa ilang bayad.  Makalingaw ang pagpangutang apan suliran ang pagbayad.  Ang dakong patong sa interest ang nakapalaksot sa maong transaksyon ug maoy hinungdan sa pagpalta sa bayronon.  Kay lagi ginaingon man nga “Motubo gayod ang utang bisan dili pa kini mabisibisan sa ulan.” Hala no!

Dili na ma-postpone

Human mapasar ang ordinansa sa Sangguniang Panglungsod sa dakbayan sa Sugbo nga gipangamahanan ni Konsehal Rey Gealon, gidili na karon sa mga punerarya ang paghikaw sa ilang serbisyo ngadto sa minatay kon ang tagtungod niini dili pa makabayad sa mga funeral expenses.  Matud ni Konsehal Gealon, alang sa mga kabus ug nahikawan sa dignidad ang maong ordinansa busa dili malalis ang kaanindot sa katuyoan niini.  Matud pa sa akong bilyako’ng amigo, “Wala na’y rason si Lolo nga ipostpone ang iyang kamatayon tungod lang kay way pambayad sa punerarya.”  Pagkatoytoy!

Magpakamatay’ng mapagarbohon

Dul-an sa napulo ka mga mga nasalbar nga mga iro gikan sa biniyaan nga illegal dog shelter sa Barangay Adlaon, Cebu City ang gikataho nga nangamatay una pa sa gitakda nga adlaw sa pagpatay kanila pinaagi sa euthanasia.  Nasayod ba kaha ang mga iro nga kamatayon ra gihapon ang ilang padulngan mao nga giunhan na lang nila paghunos ang ilang kinabuhi.  Ni’ng kahimtanga, daw mitamod ang mga iro sa panultihon nga, “Angayan nga magpakamatay kita’ng mapagarbohon kon dili na possible ang pagpakabuhi nga mapagarbohon.”A  Muleeeng!