EDITORYAL - Nagkapulpol sa English ang Pilipinas?

Ang pinulongang English ug kahanas sa pagestorya gamit ang maong lengwahe usa sa mga rason kun nganong daling dawaton sa mga langyaw nga kompanya ang mga Pilipino kun itandi sa ubang mga nasyon.

Apan karon hinay-hinay ng nakaapas ang ubang mga nasud ilabi na dinhi sa Southeast Asia human nga gihimo nang kabahin sa ilang asignatura sa ilang basic education ang English subjects.

Daan nang silang nigamit og K to12 system of education o 12 ka tuig nga basic education, samtang ang Pilipinas wala pay napulo ka tuig sa dihang nisagop sa maong sistema. Apan bisan paman tuod og kuwang og duha ka tuig kaniadto ang basic education sa mga Pilipino daghan o milyones gihapon ang nakatrabaho didto sa abroad sa nagkalain-laing karera sud sa pila ka dekada.

Dili ang basic education ang ilang gibasihan kaniadto pagpili o pagdawat sa mga Pilipinong aplikante, kondili ang ilang kamahoan sa English, makasabot ug makamaong moestorya bisan dili gyud kaayo hanas ang uban.

Ang importante man gud sa trabaho mao ang komunikasyon, unsaon man nang kumpleto og basic education unya di makamaong mobasa, mosuwat , mosabot ug makaestorya og English?

Apan ning bag-o, nagkadaghan ng mga overseas workers gikan sa Southeast Asia ug Africa nga nakatrabaho sa mga nasud nga kaniadto dominanteng mga Pilipino ray gipili nilang dawaton sama sa Middle East.

Kini tungod kay makamao na man sab silang mo-English, pun-an pa nga produkto sila sa K to 12 system didto sa ilang nasud, nawala na ang bentaha sa mga Pilipino.

Pun-an pa sab nga naghigpit na karon ang mga kompanya tungod sa International Standards gumikan sa daghang mga naaksidente, dili na paigo ang experience ug kamao lang mo English aron makatrabaho sa abroad. Dili na mosalir ang “yes sir, no sir” lang kay kinahanglan na sab gyud ang papeles o sertipiko.

Sa uwahing edition sa English Proficiency Index 2022 sa international education company nga Education First, natagak ang Pilipinas og upat ka ang-ang, gikan sa ika-18 sa 111 ka mga nasud sa hanas sa English, naa nalang kini karon sa ika-22.

Importante gyud nga balikan og tan-aw sa DepEd ang curriculum niini, maayong tangtangon ang mga dili importanteng asignatura ug tutokan ang English proficiency sa mga tinun-an ug ang mga technical ug technological courses para sa mga kabataang Pilipino.