Atik, o tiunay?

Ang baso nga miliki dili na mahibalik ngadto sa orihinal niining hitusura.

Plastiran man o butangag sealant aron matakpan ang liki, mosamot hinuon kaklaro nga adunay deperensiyang gitagoan sa ilawom.

Ang liki, liki na gayod. Mao na lamay mahimo ang paghatag og sobrang pag-amping niini aron dili mahinayon ang hingpit nga pagkabuak.

Aniay akong kaugalingong basa sa nahitabong pag-demote ni House Speaker Martin Romualdez kang Rep. Gloria Macapagal Arroyo (RGMA) ug sa pagresayin ni Vice President Sara ‘Inday’ Z. Duterte-Carpio isip chairperson sa ilang Lakas-Christian Muslim Democrats (Lakas-CMD) nga partido.

Wala magustoi ni Inday ang pagka-demote ni RGMA. Kay nagbase kini sa mga maling akala o hakahaka.

May kalangsa siyang natimahoan ning gihimo ni Martin, diin sa iyang tan-aw sayo ra kaayong namolitika tungod sa dakong ambisyon niini nga molansar pagka-presidente sa Pilipinas sa 2028 election.

Ig-agaw si Martin ni PBBM. Oras nga may himoon nang kandidato pagka-pangulo ang Lakas-CMD, seguradong si Martin maoy dapigan.

Unya si Inday?  Best bet baya siya sa katawhan pagka-presidente sa 2028? Di ba, masamok na? Hinungdan, milihay dayon si Inday.

May liki na ang relasiyon ni Inday ug Martin. Ug gimatuod kini sa diskurso ni PBBM sa miaging May 27, 2023 Pier 88 launching didto sa Liloan, Cebu dihang siya mingon:

“Parang nabalik ako sa kampanya na kung saan kami ni Inday Sara ay nagbungisngisan ulit…I told her that, dito sa mga gulong nangyayari, I have just officially designated myself as your self-appointed official BFF. So kahit…sorry na lang, sayod mo at gusto mo, I’m still your number one fan.”

Dayon milingi siya ni Inday, kinsa mipahiyom man tuod pero maila nga complimentary lamang.

Kauban baya sila sa miaging pangampanya. Hasta kapila balikbalika ang pasalig ni BBM nga pabaratohon niya ang bugas, sumpoon ang illegal drugs and corruption para sabay-sabay tayong makabangon muli. Ug natuman ba?

Ning pagpamunoan ni PBBM, kita nakaila na kaniya. Tam-is kaayo siyang manulti. Pero kulang sa buhat.

Mao nga mabahin gyod ang hunahuna sa tawo kon kining iyang pagdayeg-idolo ni Inday, tiunay ba, o bolatik ra?

Ato ning masayran pagdis-og pa sa panahon ning ilang panag-uban. Unta, dili mabuak ang miliki nang Uniteam.