Unsa may prioridad?
Nag-awas na ba ang kwarta sa panudlanan sa dakbayan sa Sugbo nga sa dakong kasayon mahimong iwaldas sa mga opisyal alang sa usa lang ka selebrasyon?
Nanobra ba ang salapi sa kagamhanan alang sa batakan ta nga panginahanglan aron mogasto ang syudad og P11.5 milyones alang sa pagsaulog sa ika-125 ka tuig nga kasumaran sa Independence Day?
Sa miaging semana giaprobahan sa konseho sa dakbayan ang P11.5M nga gahin alang sa selebrasyon tungod kay daghan kuno ang kalihukan nga giandam.
Lakip niini ang pagpahigayon og drum and bugle competition ug festival competition tali sa mga barangay sa dakbayan.
Segun sa report ni konsehal Noel Wenceslao, chairman sa committee on budget and finance sa konseho, ang budget gipreparar sa buhatan ni Mayor Michael Rama.
Lakip sa gahin mao ang P900,000 alang sa drum and bugle competition; P7,745,000 alang sa barangayan cultural competition; P1,380,000 alang sa Independence Day Ball; P965,000 alang sa mga T-shirt; ug P340,000 alang sa pack meals ug mga flaglets.
Si Konsehal Nestor Archival Sr., minority leader sa Konseho, misuway pagkwestiyon sa kadako sa kantidad nga gigahin alang sa selebrasyon apan way bisan usa sa iyang mga kaubang konsehal ang misuporta niya.
Naaprobahan gyud ang paggahin sa pundo sa mayoriya sa mga konsehal. Unsay nahitabo sa mga sakop sa konseho sa dakbayan?
Mao ba ni ang "pro-people" nga gipasiatab ni Mayor Michael Rama---ang iwaldas ang kwarta sa mga magbubuhis sa syudad?
Pasayloa nga waldas ang termino nga akong gigamit tungod kay wa koy laing makitang haom paghulagway niining ilang gihimo. Matag-tuig dunay pinasahi nga Sinulog sa Kabataan/Barangay usa ka semana sa dili pa ang Sinulog grand parade.
Diha sa maong Sinulog sa Kabataan/Barangay magtigi ang nagkadaiyang mga barangay. Kuwang pa ba ni aron mogasto ta og laing kalihukan karong Hunyo alang sa competition sa mga festival sa kabarangayan?
Dili ba ni mahimong ihuwat alang sa Sinulog karong Enero aron magamit ang dakong pundo nga gigahin alang niini sa mas importante ug mahinungdanong serbisyo? Kun di ni pagwaldas sa kwarta sa dakbayan, wala ko masayod unsay tawag niini!
Mas importante ba ni kaysa pagpahuman sa Cebu City Medical Center nga gisalig nalang sa dakbayan sa mga hinabang? Dili ba makauuwaw nga nagpakilimos ta sa dagkong mga negosyante aron ipahuman ang atong tambalanan samtang kita gigasto ang buhis sa katawhan sa pagpahigayon og luho nga selebrasyon?
Unsa ba gyuy prioridad sa kagamhanan sa dakbayan?
- Latest