Habal-habal

Nindot ang gihimo ni Mayor Michael Rama nga nag-isyu siya og executive order alang sa pagmugna og opisina nga modumala sa mga habal-habal drivers dinhi sa Cebu City.

Sa ato pa, maisip na unya nga “legitimate” ang operation sa mga habal-habal drivers dinhi sa siyudad, ug ilista na sila sa opisina sa City Hall nga ipamugna sa mayor.

Sigurado ko nga daghang habal-habal drivers nga mopagakpak niini. Awhag lang nako sa modumala unya niining mao nga opisina nga siguroa nga matuman ang mga lagda.

Unsa may lagda? Ang mga habal-habal drivers nga maisip nga legitimate members kinahanglang adunay driver’s license, unya rehistrado ang ilang mga motorsiklo.

Busa, karon pa lang daan, kinahanglan nga kamong mga presidente sa lainlaing kahugpongan sa mga habal-habal drivers, agniha na ang inyong mga sakop nga wa pay lisensya nga molukat na.

Kon ang ilang mga motorsiklo wa pa ma-renew ang rehistro, kinahanglang himoan ninyo kini og lakang. Unta, ang opisina nga ipamugna ni Mayor Rama motan-aw sab sa pangabuso sa mga habal-habal drivers.

Pangabuso kay nagpataka lang sila’g singil og dagkong plitehan bisan duol ra kaayo ang padulngan. Ang mga pasahero tawon mapugos na lang sa pagbayad kay mao may ilang singil.

Kinahanglan nga dili sab mo mangabuso ngadto sa inyong mga pasahero.

* * *

Posible nga isuspenso sa Land Transportation Office (LTO) ang lisensiya sa driver sa patrol vehicle sa usa ka radio station dinhi sa Cebu City kay migukod kini sa emergency vehicle.

Gipadad-an na og suwat LTO-7 director Victor Caindec ang tagdumala sa mao nga radio station aron nga mandoan niini ang iyang driver nga moadto sa LTO sa labing dali nga panahon.

Sigurado ko nga kasab-an gyud ang maong driver nga migukod sa emergency vehicle aron makauna kini pagresponde sa alarma.

Abi ninyo, nabatasan man gud sa mga reporter, ilabi na sa radyo nga mag-unhanay kon kinsa kanila ang makauna sa pag-report. Tingali, wa sila masayod nga gidili ang “tailgating.”

Bisan pa og patrol vehicle kini sa radio station, wa gihapon kini tuguti nga mogukod sa mga emergency vehicle. Abi ninyo og ngano?

Ang mga emergency vehicle gitugotan nga mosugat sa mga sakyanan agi sa pikas lane sa karsada, aron mahiabot sila pagdali sa ospital, sa mga nasunogan ug sa nahitaboan sa aksidente.

Kon ang patrol vehicle sa radio station mosunod sa mga emergency vehicle, makalapas na sila sa balaod sa tukma nga pagmaneho og sakyanan ug maisip na nga “reckless driving.”

Busa, unta dili kini himoon sa akong mga amigo nga reporter, ilabi na ang mga nadestino sa police ug hospital beat.