Bakakon ang madaug-daugon

Mipasaka og balaodnon si Senador Robin Padilla nga buot magsilot sa mga law enforcement personnel kon masuta nga namakak sila atol sa ipahigayon nga mga congressional inquiries. Giduso sa senador kining balaodnon human nagmakuli pagtug-an ang mga kapolisan sa tinuod nga panghitabo kabahin sa pagkasakmit P6.7 bilyones nga kantidad sa shabu.  Aduna na ma’y balaod sa salaod nga perjury.  Apan daw naglisod gihapon ang kagamhanan sa pagtaral sa mga bakakon.  Tinuod tingale ang panultihon nga “Yano kaayo nga makapamakak kadtong mga madaug-daugon aron padayon sila nga makapangdaug-daug.”  Madahaan!

Mopalit og “uban”

Giaprobahan na sa konseho sa dakbayan sa Sugbo ang ordinansa nga magsilot niadtong mag-ali sa mga mga sidewalks, alleys ug mga agianan sa tumong nga mahawan kini ug dili makabalda sa  paglakaw sa katawhan.  Gikasagmuyo ang maong ordinansa sa apektado’ng mga vendors apan gikahimuot usab kini sa mga tag-iya sa establisemento. Tungod sa maong balaodnon, nabalaka ang akong amigo kon asa na niya ibaligya ang iyang natigom nga puti’ng buhok (‘UBAN’) kay sa dalan Colon ra siya nakakita og mopalit niini.  Ang iya diay’ng ipasabot mao kadtong vendor nga adunay paskin nga “Mopalit og dugmok nga singsing, alahas, kwentas ug “UBAN PA.”  Pagkatoytoy!

Kon dili kutloan, kuhaan

Giaprobahan na sa senado ang balaodnon nga mag-establisar sa Maharlika Investment Fund (MIF), ang giingon nga sovereign wealth fund nga magamit sa gobyerno kon kini mopundar og mga investments.  Gitakda na usab ang bicameral meeting aron masipong ang bersiyon sa bill sa senado ug sa kongreso.  Bisan pa man sa gipangandak nga safety nets aron dili maabusahan ang maong pundo, ang kabalaka nga mausik ra unya ang kwarta sa kagamhanan, padayon nga naghamok sa hunahuna sa katawhan.  Kay ginaingon baya nga “Kinaiya na sa tawo nga kon tugonon/pahatdon og estorya, kutloan; kon pahatdon og kwarta, kuhaan”.  Fezteleern!

Dili babag sa edukasyon

Gihimug-atan ni Bise Presidente ug Education Secretary Sara Duterte-Carpio ang hiniusang tahas alang sa usa ka inclusive education aron pagseguro nga ang atong edukasyon naglangkob sa tanan ug mopahunong sa kultura sa paglain-lain nga walay pagpihig sa lumad, mga kaigsoonan’g Muslim ug mga PWDs. Dili kay kultura lang sa paglai-lain maoy hinungdan sa laksot nga kahimtang sa atong edukasyon kon dili ang tibuok educationan system lakip na ang kalisod sa katawhan. Angay hinuklogan ang panultihon nga, “Dili nato tugotan nga ang atong pag-eskuwela, makapakgang sa atong edukasyon o pagtoon.”  Muleeng!

Sayo nga gibansay

Tungod sa ilang paningkamot nga mahunong na ang child labor sa nasud sa tuig 2028, gipanghingusgan sa Department of Labor ang Employment-Central Visayas (DOLE- 7) ang pag-monitor sa mga child laborers sa probinsya sa Negros Oriental ug Siquijor.  Sa kanhiay’ng panahon daghan ang kabataan nga patrabahoon na sa ginikanan aron makatabang sa kalisod.  Busa kon unsay trabaho sa amahan, mao usab ang dangatan sa anak.  Ang sayo nga pagbansay sa mga anak sa panginabuhian sa ginikanan, makapahinumdum sa linya sa kanta-komedya nga, “Sa lungsod sa N_ _a, bata pa wakwak na.”  Fishkots!