Amen ni Hudas

Makamao ‘sab mopasundayag og drama si House Speaker Martin Romualdez aron ipakita sa publiko ang mga hiyas nga anaa sa iyang pagkatawo.

Diin, ang Kongreso mao pay gihimong entablado nga gitambongan sa mga kongresista dihang gipapanumpa na si Pampanga Rep. Aurelio ‘Dong’ Gonzales, isip mao nay bag-ong senior deputy speaker, puli ni Pampanga Rep. Gloria Macapagal Arroyo (PGMA), kinsa gi-demote mismo ni House Speaker Romualdez ug gihimo na lang usa ka deputy speaker.

Sakit man, mapaubsanon kining gidawat ni PGMA, nga maoy nakapahimulag ni Bise Presidente Sara ‘Inday’ Z. Duterte-Carpio sa ilang partido, Lakas-Christian Muslim Democrats (Lakas-CMD) human motunol-pahibalo sa iyang irrevocable resignation isip chairperson.

Makapahiubos paminawon. Silang tulo: Romualdez, PGMA ug Inday magkauban ra sa usa ka partido ug may mga dagkong papel.

Ug nganong nakaako man sa pagdagmal si Romualdez ni PGMA sa ilang pagka-usa ka punoan? Kahakog sa gahom bay hinungdan?

Dili ba ang dahon nga gipungil gikan sa sanga, may duga mang motulo timaan nga gisakitan? Unsa na kaha kitang tawo nga may balatian?

Ug mao kini ang gibati ni Inday. Wala makapugong, mipabuhagay sa iyang emosiyon: “Sa imong ambisyon, huwag kang tambaloslos!”

Makasamad sa dughan ang gihimo ni Romualdez. Kon si Inday gisakitan, samot na si PGMA. Pero nagpabiling kalma ug kamapailobon si PGMA.

Isip usa ka tadhang inahan sa politika, wala siya moresbak bisan gamay.

Iyang gitago ang tinuod niyang gibati aron ang miliki nga relasiyon sa matag usa dili madayon ang pagkabuak ug pagkabasag.

Mao nga dihang gisapnay-gunitan ni Romualdez ang palad ni PGMA ug siya mi-amen sa wala pa sugdi ang pagpanumpa ni Rep. Gonzales, isip bag-ong senior deputy speaker didto sa Kongreso, mapahiyomong gihatag ni PGMA ang iyang kamot nga ingon sa wala lamang siya sakiti sa unsay gibuhat ni Romualdez kaniya.

Pagka-very professional nga gawi. Sa maong eksena, daghan ang nakadayeg ni PGMA.

Samtang sa habig ni Romualdez, daghan usab ang nahinumdom sa gibuhat ni Hudas ngadto sa atong Ginoong Hesukristo. Kadtong higayon, diin human niya hagki si Hesus, gidakop dayon ang atong Manunubos sa mga Hudeyo.

May mikomentariyo. Kon may Hawok kuno ni Hudas, aduna poy Amen ni Hudas. Mao ba?