11 ka argumento batok Maharlika
1. Way sobrang kuwarta ang Pilipinas para sa Maharlika Investment Fund (lahi sa ubang kanasuran nga dagkong kita sa lana ug ubang negosyo nga sobra sa panginahanglan, maong nakabuylo ang ilang investment fund sa way pagsakripisyo sa serbisyo ngadto sa publiko);
2. Ang nagsobra sa Pilipinas mao ang utang (P13.86 trilyones hangtod sa kataposang kuwentada sa Marso 31, 2023 ug madugangan pa, kay usa sa tinubdan sa puhonan sa MIF mao ang pagpangutang);
* * *
1. Mahimutang sa risgo ang kuwarta sa Land Bank of the Philippines ug Development Bank of the Philippines (imbes pahuwaman ngadto sa mga mag-uuma, mga mangingisda ug gagmayng negosyante nga maglisod og pangutang sa commercial banks);
2. Mahimutang sa risgo ang kuwarta sa Bangko Sentral ng Pilipinas (imbes gamiton sa pagpanalipod sa peso ug nasudnong ekonomiya gikan sa nag-ung-ong nga global financial crisis);
3. Mahimong hilabtan gihapon sa MIF ang kuwarta sa mga sakop sa Social Security System ug Government Service Insurance System kay gibanhaw sa bersiyon sa Senado ang probisyon nga mahimong mobubo og puhonan ang SSS ug GSIS kon may pagtugot sa ilang mga tagduma;
* * *
1. Di na angayng hilabtan kay maayo na ang tubo sa naandan nga investments sa SSS, GSIS, LBP, DBP ug BSP;
2. Nipasidaan ang mga ekonomista nga karon ang labing peligro nga panahon sa paglusad sa investment fund tungod sa hulga sa global recession, dako ang kahigayonan nga mapurdoy ang MIF ug mapilde ang nasudnong panudlanan;
3. Kon motubo man ang MIF, gibanabana sa mga ekonomista nga di molabaw sa 5% kada tuig tungod sa katandugon sa kalibotanong ekonomiya, mas maayo pa nga, imbes isugal ang minilyon ka pesos, direkta nga ibubo sa nasudnong ekonomiya nga nitubo og kapin 6% kada tuig sa wa pay pandemya;
* * *
1. Mas mapuslanon ang kuwarta nga para unta sa MIF kon gastuhon para sa labing dinalian pero gipasagdan nga mga panginahanglan sa edukasyon, healthcare ug infrastructure;
2. Ang MIF mahimong kawaton kay ang mga tagduma pulos tinudlo ni Presidente Ferdinand Marcos Jr., nga nag-atubang og daghang kaso sa ill-gotten wealth ug wa pagbayad og buhis; ug
3. Way klaro unsay gamitan sa kita sa MIF ug unsaon pagduma ang pundo ug taphaw ang mga panagang batok sa money laundering ug ubang palusot.
* * *
- Latest
