Kahibulongang mga numero sa DOH
Sa niaging 23 na ka adlaw, way bag-ong kaso sa Covid-19 ang Cebu City, Mandaue City ug Lapu-Lapu City. Lisod tuohan. Pero mao na ang opisyal nga mga numero sa inadlaw nga Covid-19 tracker sa ulohang buhatan sa Department of Health (DOH).
Samtang nagsulbong ang bag-ong mga kaso sa Cebu Province ug ubang bahin sa Pilipinas, nga niabot na gani og kapin sa 2,000 kada adlaw, way bisan usa ka kaso ang tulo ka kinadak-ang mga syudad sa Sugbo sukad sa Mayo 2 hangtod sa Mayo 24 ning tuiga.
* * *
Labaw nga makapahibung ang ubang mga numero nga among nakit-an: Sa niaging 23 ka adlaw, wa say kausaban ang mga numero sa active cases (mga pasyente sa mga ospital ug isolation facilities) sa tulo ka syudad: Cebu City dunay 10; Mandaue City dunay tulo; ug Lapu-Lapu City dunay duha.
Masabot nganong wa mapun-i ang active cases kay wa may bag-ong kaso. Pero lisod sabton nganong wa maibani. Kay segun sa DOH kasagaran sa mga matakdan sa Covid-19 maayo na 14 ka adlaw human sa unang pagpakita sa mga timaan.
* * *
Pulos ba nabiktima sa long Covid ang 15 ka pasyente sa tulo ka syudad? Pulos ba nakaangkon og mga komplikasyon mao nga bisan dul-an na sa buwan wa pa sila makalingkawas sa Covid-19? Pulos ba senior citizens o dunay daang mga sakit maong nangaluya pag-ayo ug mas dugayng nabalikan sa kahimsog?
O, sama sa naandan, nagduka ang DOH pag-update sa ilang mga numero? O, ilang paboritong lusot sukad pagsugod sa pandemya, naproblema na sang database sa CovidKaya?
* * *
Hinaot mapasabot sa DOH ang kahibulongan nilang mga numero. Sa di pa magduda ang mga Sugbuanon sa kamatinud-anon sa ilang tracker. Ug hingpit na lang mosalikway sa tanan nilang kasayuran sa Covid-19.
Hinaot maapil sab og pasabot nganong grabe mang sulbong sa bag-ong mga kaso sa Cebu Province? Nga maoy nahimutangan sa 76% sa tanang bag-ong kaso ug 52% sa tanang aktibong kaso sa Central Visayas. Salin pa ba sa dakong tapok sa Central Visayas Regional Athletic Association (CVIRAA) Meet sa Carcar City sa niaging buwan? O kay wa motuo ang Kapitolyo sa siyensiya sa minimum health protocols?
* * *
- Latest
