Paturagas

Abogado ka, torni? Komedya nga pangutana sa mga bugoy nga sagol bugal-bugal ngadto sa usa ka tawo nga atong gitan-aw nga manggialamon apan wala motakdo ang iyang mga lihok sa unsay husto ug makiangayon---sa laktud nagpaturagas!

Niining nagpadayon nga kontrobersiya tali ni Cebu City Mayor Michael Rama ug ni Metro Cebu Water District (MCWD) chairman Joey Daluz diin gipalagpot sa mayor ang naulahi ug gihulipan sa negosyante nga si Mike Pato---haum ang maong pangutana ngadto niya.  Isip usa ka abogado nasayod ko nga nahibawo si Rama sa husto nga proseso paghulip sa chairman sa MCWD.

Bisan kun siya maoy dunay gahom ubos sa balaod pagtudlo sa mga miyembro sa MCWD board apan wala itugyan niya ang katungdanan sa direktang pagtudlo ug paghulip og chairman. Ang proseso mao nga ang mga gitudlo nga miyembro sa board maoy mopili kinsay ilang chairman pinaagi sa eleksiyon. Ug ang mga sakop ra usab sa board ang dunay gahom pagtangtang sa ilang chairman kun pananglit wala na sila makauyon niini.  Himoon ni atol sa usa ka board meeting diin kinahanglang mayoriya sa mga membro mouyon nga ideklarar nga bakante ang posisyon sa chairman. Ang nahitabo sa MCWD mao nga si Rama mipatawag og emergency meeting didto sa City Hall niadtong Mayo 16 sa hapon. Mitambong sa maong tigom ang tulo ka membro sa MCWD board uban sa mga department heads sa City Hall ug sa mga sinaligan sa mayor nga naglangkob sa iyang gitawag og "workforce."

Wala didto si Daluz sa tigom tungod kay matud niya wa siya imbitaha. Atol sa tigom tagsa-tagsa kuno nga gipangutana sa mayor ang mga nanambong unsay ilang baruganan paghulip ni Daluz isip chairman sa MCWD board. Ang kasaligan nakong tinubdan miingon nga way bisan usa nga nisupak sa gusto sa mayor. Pinasikad niini migawas ang giingong "omnibus resolution" nga nagtangtang ni Daluz isip MCWD chairman ug nagtudlo ni Pato isip hulip niya. Kun atong balikan ang mga lagda pagtangtang ug pagtudlo og bag-ong chairman sa water district mura og wala gyud ni masubay sa proseso. Kanus-a man intawn mahitabo ug unsa may kapasikaran sa pagsalmot sa mga department head sa City Hall ug sa "workforce" sa mayor pagtangtang ug pagpili og bag-ong chairman sa MCWD?

Kang kinsa mang balaod ilang gisubay nga naghatag og katungod sa mga department heads ug "workforce" sa mayor nga manghilabot sa kalihukan sa MCWD board?

Bisan asa nga angulo tan-awon klaro nga "usurpation" ang ilang gihimo sa gahom ug katungod sa MCWD board.

Labihan ra ka rubo sa ilang gihimo nga ilang nakalimtan ang hustong proseso. Ang angayang gibuhat ni Rama, kun nawad-an naman gyud siya sa pagsalig ni Daluz, mao ang pagkuha sa simpatiya sa laing upat ka membro sa board. Kini maoy tukma ug legal nga paagi pagtangtang ni Daluz. Di ba, torni?