BoC ray nagtudlo?

Miangkon ang Bureau of Customs nga samtang aduna silay dagkong nabuhat alang sa pagsanta sa smuggling gumikan sa pag-full computerization sa ilang sistema, wala gihapon silay hanaw kon unsaon pagsulbad sa hingpit ang technical smuggling nga mahitabo kon adunay “undervaluation ug misdeclaration” sa mga produkto nga mosulod sa nasud.  Unsa kaha kon tinud-on sa BoC pagpahigayon og inspection sa produkto nga ipayuhot aron wala na’y technical smuggling? Mora’g sakto man ang komedya sa akong amigo nga ang taga-BoC ra usab maoy nagtudlo sa mga negosyante kon unsaon pagpalusot.  Haum ang ulohan sa kanta nga, “Teach your Children.”  Madahaaan!

“Piya-it must die”

Atol sa hearing sa Senado kabahin sa P 6.7-billion nga kantidad sa illegal drugs nga nasakmit sa kapolisan, gi-cite og contempt sa mga senador si Lt.Col Arnulfo Ibanez ug MSgt. Rodolfo Mayo tungod sa ilang pag-cover up ug pagpamakak sa ilang kalambigitan sa maong kaso. Alang sa mga senador, ilang giilad ug gibugal-bugalan ang senado. Bisan mag-ugtas pa ang senado ni’ng ilang imbestigasyon, dili nila mapugos pagpatug-an ang mga nalambigit nga kapolisan. Daw adunay mantra ang kapolisan nga “piya-it must die.” Matud pa sa akong amigo, “May’pag pakantahon nila ang Bungi, makalitok pa’g ‘Udlot sa Saging’ (All of a Sudden).” Pagkatuytoy!

ATM-automatic to misses

Mipasidaan ang Bangko Sentral ng Pilipinas (BSP) sa mga ATM Cardholders sa dili pag-patronize sa mga “Sangla-ATM” nga modus sa pag-loan og kwarta tungod kay moresulta kini sa labihan pa’ng pinansyal nga kalisod.  Tinuod nga makaloloy ang kahimtang sa nangutang nga ang ATM maoy collateral. Apan kasagaran mapugos pagprenda sa ATM kay dili man gayod makahuwam kon dili kini itahan. Sukwahi hinuon sa akong amigo kay dili kuno siya maka-loan kay bisan ATM ang iyang sweldo, dili man kini ipasabot nga ‘Automatic Teller Machine’ kon dili “Automatic To Misses.”  Fezteleern!

Magpagoryo-goryo ang gobiyerno

Misaad ang Bureau of Plant Industry (BPI) nga mo-implementar kini’g mga reporma aron kapugngan ang pagmanipula na usab sa presyo sa sibuyas-bombay.  Lakip sa maong mga reporma ang posibleng pag-suspenso sa importasyon sa panahon sa ting-ani.  Maanindot ang laraw sa BPI apan hugot gihapon ang pagtoo sa katawhan nga kunsabo ang kagamhanan sa pagsaka sa presyo sa sibuyas-bombay sa miaging tuig.  Kay ginaingon baya nga, “Usahay, ang kagamhanan magpagoryo-goryo aron manipulahon ug ilaron ang katawhan nga mosanong sa ilang mga polisiya ug saad.”  Muleeng!

Dili ambulance chaser

Dili maayo ang kaugmaon sa mga Pinoy nga seafarers tungod kay ang mga shipowners ug international maritime employers mihukom na nga mangita na lang og tripulante sa laing nasud. Kini aron masalbar sila sa dili makiangayon’g monetary claims nga gisang-at sa mga bilyako’ng abogado nga moawhag sa mga tripulante pagkiha sa ilang employer sa bisan unsang gagmay’g rason. Ginadili gyud unta ang ‘ambulance chasing’, apan sa kabilyako sa uban’g abogado, kon sukmatan ngano nga ila kining buhaton, morason lang sa pag-ingon nga, “Dili man ko ambulance chaser, kay mag-una man ko og abot sa ambulansya.”  Tua raaa!