Unsa may lagda nga gilapas sa kandidata?
Daghan ang wala makauyon sa desinyo sa gown nga gisul-ob sa kandidata sa Sugbo sa Binibining Pilipinas 2023 tungod kay sama kini sa bisti sa Balaang Bata nga si Senyor Santo Niño.
Ang uban dali nga mikondinar ni Mary Joy Dacoron tungod sa iyang costume. Gani nahimo siyang sentro sa pagbiay-biay diha sa social media.
Dunay uban nga mihulagway nga blasphemy ang iyang gihimo sanglit sagrado ang Santo Niño.
Ang mga opisyal simbahan dali sab nga nakapanghunaw. Wala na sila moangkon nga gitugotan nila ang pagpananghid sa kandidata nga gamiton ang desinyo sa sinina sa Santo Niño isip iyang costume.
Sigun sa mga opisyal sa simbahan ang ilang gitugot mao ra ang pictorial diha sa simbahan.
Tugotan ta nga wala nila itugot apan nganong way nibadlong sa kandidata dihang mihimo kini sa pictorial gamit ang costume?
Wala sila makakita o nisakay lang pud sila sa reaksiyon sa mga hilig magpakaaron ingnon?
Di man ni unang higayon nga nakakita ta og dunay nagsul-ob og sapot sa Santo Niño. Panahon sa Sinulog dunay daghan nga mga magsinina og sama sa Balaang Bata apan nganong wa badlonga sa simbahan?
Gawas pa unsa may lagda nga nalapas sa kandidata sa Sugbo sa iyang gisul-ob? Duna bay lagda ang simbahan mahitungod niini?
Kun duna man nganong wala kabadlong ang kadagkoan sa simbahan sa mga nagsul-ob kaniadto og sapot sa Santo Niño?
Ug tingali nagkuwang ang kadagkuan sa simbahan sa pag-edukar sa iyang mga sakop nga gidili ang paggamit sa desenyo sa bisti sa mga santos.
Ug kun way lagda ang simbahan mahitungod niini, nganong ato mang ipanghimaraot ang kandidata nga wa man diay siyay nahimong kalapasan?
Sigurado ko nga di intensiyon sa kandidata nga bugalbugalan ang Balaang Bata sa iyang paggamit sa desenyo sa sapot niini.
Busa di makiangayon nga siya kondinahon sa pagsul-ob sa sapot nga sama sa Santo Niño.
Ug aron malikayan ang ingon niini nga mga kontrobersiya sa umaabot, mas maayo nga moluwat og mga lagda ang simbahan mahitungod niini.
- Latest