Parehas ra’g resulta

Giawhag ni Presidente Marcos, Jr. ang mga local officials sa paglig-on sa ilang pakigkumboya (partnership) sa nasyonal nga kagamhanan aron mapalambo ug mapatuman ang development agenda sa kasamtangang administrasyon. Sa kahimtang sa mga kalungsoran karon, angay nga ang nasudnong kagamhanan maoy mokawhat ngadto sa mga lokal nga kagamhanan kay anaa man sa nahauna ang kagahum ug resources.  Mora’g haum ang panahom nga, “Ang kagamhanan kanunay magpili tali sa pagpamakak o pagpakigbatok sa kakabus, diin kon bisan unsa ang pilion, moresulta lang gihapon ngadto sa dugang pagpamakak ug dugang kakabos.” Madahaaan!

Modus ang pagpaka-uwaw

Gironda sa mga tinugyanan sa PNP Anti-Cybercrime Group ang Realm Shifters BPO Services, usa ka online lending agency sa Pasay City, ug gisikop ang walo ka ahente niini human sa sumbong nga pagpanghulga ug pagpakauwaw diha sa social media sa mga nakautang kanila. Modus na kini sa mga ahente sa mga lending companies ug usahay wala na gani mga batasan. Makapahinumdum sa nagpa-lending nga naningil sa nangutang sa pag-ingon, “Ka-wala sad nimo’y uwaw uy! Sige ra ko paningil pero di jud ka mobayad”.  Apan misulinga lang ang gipaninglan pagtubag nga, “Ikaw maoy walay uwaw, kay bisan wa ko’y ikabayad, sige gihapon ka’g paningil.”  Pagkatoytoy!

Unsaon paglipat-lipat

Matud ni Justice Secretary Crispin Remulla, aduna siya’y nadawat nga impormasyon nga mopauli na si Kongresman Arnolfo Teves dinhi sa Pilipinas, ug mahimong maatol kini sa adlaw diin ipasaka usab ang kaso batok kaniya. Sama sa estorya sa bibliya kabahin sa Prodigal Son, daw gibati og kahinangop si Secretary Remulla sa pagpauli sa kongresman.  Apan sukwahi hinuon sa maong estorya, walay piging nga pagabuhaton sa pagpauli unya ni Teves. Matud pa sa akong amigo, “Ning higayona, makita nato kon igmat ba ang kagamhanan pagpatuman sa balaod ug makita usab nato unsaon ni Teves paglipat-lipat ang kagamhanan.”  Fezteleern!

Lantugi sa suholan

Alang sa mga magpapatigayon sa Sugbo, angayan nga ang Regional Tripartite Wages and Producivity Board ang mohukom sa bisan unsa’ng pagpasaka sa suholan ug dili ipaagi sa pagpasaka og balaod sa Kongreso. Dakong lantugi kanunay tali sa mga negosyante ug magbabalaod ang hisgutanan sa pagpausbaw sa suholan ug matag habig adunay punto sa ilang argumento. Apan, bisan kon si kinsa pa ang magbuot sa pagpasaka sa suholan, ang kamatuoran nagpadayag nga kon aduna may pag-usbaw sa suholan, igo ra ang gidak-on niini mopa-usbaw sa buhis apan diyotay ra kini aron makadugang sa take-home pay sa mamumu-o.  May’pag moligeed!

Dili seryoso nga polisiya

Gikataho nga gibalhin ngadto sa probinsya sa Negros Oriental ang duha ka sakop sa Mobile Patrol Unit nga nasakpan nga natulog sulod sa patrol car ug nakuhaan og video nga mikatap sa social media.  Ang pagbalhin sa assignment isip silot sa salaud maingon nato nga dili epektibo nga paagi pag-umol sa disiplina sa polis. Hinunoa, gidala na hinuon niini ang iyang badlongon nga kinaiya ngadto sa laing lugar. Kining pagabalhin lang sa duha ka natulog nga polis, nagpamatuod sa panultihon nga, “Ang sanctions senyales lamang sa kalagot ug dili instrumento sa seryoso ug tiunay nga polisiya.”  Muleeeng!