Pagkamalungtaron ang yawe

Gilagdaan ang kasabotan tali sa Department of Finance-Bureau of Local Government (DoF-BLGF), mga kagamhanang lokal ug ubang institusyon sa kagamhanan alang sa Local Government Reform Project (LGRP) nga gitumong sa pagpalambo sa revenue-generating capacity ingon man pag-integrate sa information system sa property taxation sa kagamhanan’g lokal.  Yawe sa kalampusan ang pagkamalungtaron (sustainability) sa maong proyekto, butang nga angayan hatagan pagtagad sa tigpasiugda.  Kay ginaingong baya nga, “Kay gitugyan man nato sa kagamhanan ang pagdumala sa atong kalasangan, nasinati na nato karon ang kakulang sa mga kakahoyan.”  Fezteleern!

Moresulta ang kahangol

Adunay nabatyagan nga pagsaka sa presyo sa pulang-sibuyas sa kamerkadohan sa Metro Manila gikan sa P180 ngadto sa P 200 ang matag kilo.  Hinaut nga dili kini indikasyon nga mahibalik kita sa kahimtang kanhi nga adunay artificial nga kakulangon sa pulang-sibuyas tungod sa hoarding hinungdan nga misaka pag-ayo ang presyo. Mora’g adunay gimingaw sa DA sa ilang “kalingawan ug dako’ng kahinguhaan” kabahin ni’ng maong produkto.  Apan angayan unta nilang tamdan ang panahom nga, “Maghako-hako ka’g pagkaon, kini malatâ; maghako-hako ka’g salapi, ikaw ang malatâ.  Apan kon maghako-hako ka’g gahum, ang nasud maoy malatâ.”  Madahaaan!

Kompromiso nga kasabotan

Gipahibawo sa kagamhanan sa Kuwait ang atong Department of Foreign Affairs (DFA) nga gisuspende una sa maong nasud ang pagpanghatag og bag-ong entry visa sa mga Filipino tungod sa giingong kapakyas sa atong kagamhanan pagtuman sa mga labor agreements tali sa duha ka nasud. Dakong tampaling sa mga opisyales sa DFA kini nga panghitabo.  Hinaut nga mahigalaon nga solusyon ang makab-ot sa duha ka nasud ug dili usa ka kompromiso.  Kay ginaingon baya nga, “Ang kompromiso (compromise) usa ka kasabutan tali sa duha ka habig sa pagbuhat sa butang nga silang duha mismo nagtuo nga sayop.”  Atala lageee!

Haum nga kriminal

Matud ni Presidente Marcos, Jr., nagkaduol na ang kagamhanan sa iyang katuyoan pagpapauli ni Negros Oriental Representative Arnie Teves, Jr. balik sa Pilipinas.  Kini human balibari sa nasud sa East Timor ang aplikasyon sa kongresman alang sa iya unta’ng political asylum.  Bisan sa pagkondena sa Kongreso kang Kongresista nga miresulta sa iyang sa pagka-suspenso, padayon gihapon nga danlog ug idlas ang naulahi sa kasway sa balaod.  Haum ang panultihon nga “Ang matag katilingban adunay pahat sa mga kriminal nga angayan niini; sa samang paagi nga matag katilingban maka-angkon usab sa matang sa balaod nga iyang gi-insister nga ipatuman.”  Muleeeng!

Genius ang magdamgo

Gipa-imbestigar ni PRO-7 Director Brigadier General Anthony Aberin ang duha ka polis nga sakop sa Mobile Patrol Unit sa Cebu City Police Office (CCPO) nga nasakpan nga natulog sulod sa ilang patrol car samtang on-duty.  Nag-andar ang makina ug aircon sa sakyanan samtang natulog ang duha ka polis.  Sa panahon sa imbestigasyon, mahimong i-rason sa duha ka polis ang mga pagya nga, “Genius ang tawo kon siya magdamgo.”  Ug kay mga polis man sila, mahimo usab nga irason ang pagya nga “Kon ang kahimtang malisod na, ang naglisod modangop sa pagkatulog.”  Pagkatoytoy!