Gugma’ng wala panumbalinga

Matud pa ni Presidente Marcos, Jr., dili mahimo’ng undangon ang atong pakighigala sa Beijing busa padayon nga balansehon sa Pilipinas ang relasyon niini sa China samtang depensahan usab niini ang soberinya sa nasud. Mahimo kini pinaagi sa pagbaton og bukas nga linya sa komunikasyon. Nahisama ang kahimtang sa Pilipinas sa lalaki nga labihan ang paghigugma sa babaye, nga bisan kon dagmalan ug daug-daugon na, dili gihapon makigbuwag. Dili ikahibulong ang maong polisiya sa Presidente kay ginaingon man nga “Ang gugma nga molungtad mao kadto’ng gugma nga wala tagda ni panumbalinga.” Faeetz!

Dautan’g ehemplo

Gipahibalo sa Bangko Sentral ng Pilipinas nga ang atong bag-ong 1000-Piso polymer bill giila sa International Banknote Society (IBNS) nga “Banknote of the Year” sa tuig 2022. Gidayeg sa IBNS ang desinyo niini nga kumbinasyon sa kolor asul ug sa iyang “environmental motif”. Makapasigarbo ang maong pasidungog apan baniog nga daghan gihapon mga tindera sa kamerkadohan ang magmakuli pagdawat sa maong salapi. Kay kon mosipyat ug masayop ka paghipos sa kwarta, mahimo kining hinungdan nga dili na kini magamit. Dili lang kita mabalaka kay ginaingon man nga, “Bisan kadtong mga butang nga dili na mapuslan, mahimo man gamiton isip dautan nga ehemplo.” Madahaan!

Nag-ihap maoy magbuot

Mogamit na ang COMELEC og teknolohiya sa 2025 midterm elections nga dili lang fully automated system apan aduna usab kini full transparency features. Tuyo sa COMELEC nga matubag ang mga pagsaway nga dili transparent ang kasamtangan’g system sa botohan. Dako ang bulohaton sa COMELEC sa pagkumbinsir sa katawhan nga limpyo ug matinud-anon ang piniliay. Sa kapulihay, ang pamaagi sa piniliay nga gilaraw sa COMELEC, usa lang ka tipik sa tibuok proseso. Ang laing tipik mao ang kalidad sa mga kandidato. Kay ginaingon man nga, “Dili ang mibotar kon dili kadto’ng nag-ihap sa boto maoy nagbuot sa resulta sa eleksyon.” Fezteleern!

Aksidente’ng tinuyoan

Mipadayag sa ilang kahingawa ang Philippine National Police-Highway Patrol Group (PNP-HPG)) tungod sa nagkadaghan nga mga aksidente sa kadalanan nga naglambigit sa mga motorsiklo. Mipahinumdum ang PNP-HPG sa mga motorista nga mag-amping ug magmatngon sa ilang pagmaneho ug mosubay gayod sa lagda sa trapiko aron malikayan ang disgrasya. Ang aksidente giingon nga wala tuyoa. Apan tungod kay daghang “kamote riders” ang magkiat lang sa pagmaneho, makaingon usab kita usahay nga dili aksidente kon dili tinuyoan ang nahitabo’ng disgrasya. Ug adunay gitumbok nga tulo ka hinungdan sa aksidente: “Wala ang hingtungdan Maghunahuna, Wala siya Makakita, ug wala usab siya Masayod.”  Muleeng!

Wala’y kapital

Buot ni Presidente Marcos, Jr. nga adunay matukod nga mga pabrika sa battery dinhi sa Pilipinas nga mahimong motubag sa mga suliran sa enerhiya sa nasud. Giangkon hinuon sa Presidente nga ni’ng maong katuyoan, nagkinahanglan kita sa teknolohiya ug puhonan ug dinhi kinahanglan ang tabang sa mga magpapatigayon. Makapahinumdum sa pangutana kon unsa ang capital sa Pilipinas. Inay motubag nga ‘Manila”, mikomentaryo hinoon ang diplomat nga Intsik nga, “Purdoy man Pilipinas mao wala capital.” Pagkatoytoy!