Wa gyud makat-on

Duha ka sunod-sunod nga sipang buto ang mipukaw nako pasado alas 6 sa buntag kagahapon, Miyerkules, Mayo 3.

Madungog ang kaguliyang sa gawas sa karsada lahi kay sa naandan nga kamingaw matagbuntag.

Nigawas ko aron magsusi unsay nahitabo ug maoy akong nasayran gikan sa silingan nga dunay mga piniriso gikan sa Operation Second Chance nga miiskapo.

Ang duha ka mga buto nga nipukaw nako gikan sa pusil sa gwardiya nga mipasalba aron pagbadlong sa siyam ka mga batan-ong priso.

Samtang nagbarog ko daplin sa dalan, duha ka mga babaye ang kusog nga naglakaw paingon sa akong nahimutangan.

Samtang nagkaduol inanay ko nga maklaro ang nangluspad nilang bayhon ug nagkurog nga mga kamot.

Gikan diay sila sa second chance aron unta moduaw apan sila gibalibaran sanglit alas 9 pa magsugod ang oras sa dalaw.

Matud nila dihang miabli ang gwardiya aron pagpasabot nila nga di pa oras tingbisita, kalit midasmag ang grupo sa mga batan-ong priso ug naglumba paggawas sa gate nga wala na maakos sa gwardiya pagpugong.

Misunod ang ginukdanay apan unom lang ang nadakpan pagbalik. Sa pagsuwat ko niining lindog, tulo ang padayon pa nga gipangita sa mga awtoridad.

Di ni unang higayon nga nahitabo ang pagpuga gikan sa maong bilangguan sa mga minor de edad.

Niadtong Enero 11 duna say mga priso nga niiskapo gikan sa maong pasilidad diha sa Barangay Kalunasan.

Ug sa mga nangagi nga pag-iskapo sama ra ang paagi. Dasmagan sa mga priso ang bantay sa gate.

Kadaghan na ni mahitabo apan wala gyud makat-on og leksiyon ang mga tagdumala sa maong bilangguan.

Tingali lugak ra ang ilang paagi pagtratar sa mga priso.

Mao ni resulta kay kunohay buot nato nga ipatagamtam niining maong mga minor de edad nga di sila binilanggo sa pamasin nga mausab ang ilang kinaiya.

Panahon na tingali nga hunongon ta ang pagpakaaron-ingnon. Ato silang itratar sumala sa ilang kahimtang---mga piniriso ug dili bakasyonista!